કેનેડામાં રહેતી પંજાબી મૂળની યુટ્યુબર અને પ્રભાવક નેન્સી ગ્રેવાલની હત્યા કરવામાં આવી છે. હત્યારાએ તેના ઘરમાં ઘૂસીને તેની છરી મારીને હત્યા કરી દીધી. નેન્સી ગ્રેવાલ પંજાબમાં સામાજિક, ધાર્મિક અને રાજકીય મુદ્દાઓ પર તેના સ્પષ્ટ વિચારો માટે જાણીતી હતી. ઉગ્રવાદીઓ પર આ હત્યા કરવાનો આરોપ છે.
કેનેડાની લાસેલ પોલીસના જણાવ્યા અનુસાર, મંગળવારે રાત્રે લગભગ ૯ઃ૩૦ વાગ્યે ૪૫ વર્ષીય નેન્સી ગ્રેવાલની તેના ઘરે છરીના ઘા મારીને હત્યા કરવામાં આવી હતી. પોલીસને માહિતી મળી હતી કે મંગળવારે રાત્રે કોઈએ વિન્ડસરમાં નેન્સી ગ્રેવાલના ઘરમાં ઘૂસીને તેને છરી મારી અને તે લોહીલુહાણ હાલતમાં છોડીને ભાગી ગયો. ત્યારબાદ ગ્રેવાલને તાત્કાલિક હોસ્પિટલમાં લઈ જવામાં આવી અને તેણીનું મોત નીપજ્યું. કેનેડિયન પોલીસ અધિકારી માઈકલ પિયર્સે આ ઘટનાની જાહેરાત કરી. નેન્સી એક પંજાબી મૂળની સોશિયલ મીડિયા પ્રભાવક અને યુટ્યુબર હતી જેણે તેના વીડિયોમાં ખાલિસ્તાની પ્રવૃત્તિઓની ટીકા કરી હતી.
પંજાબની કેનેડિયન યુટ્યુબર નેન્સી ગ્રેવાલ, જે કેનેડામાં રહેતી હતી અને સોશિયલ મીડિયા પર વારંવાર વીડિયો પોસ્ટ કરતી હતી. ૧૯ જાન્યુઆરીના રોજ જન્મેલી નેન્સીના ઇન્સ્ટાગ્રામ પર લગભગ ૧૨,૦૦૦ ફોલોઅર્સ હતા. ભારત અને કેનેડા વચ્ચે વધતા વિવાદ દરમિયાન તેણીએ પોતાની યુટ્યુબ ચેનલ પર ઘણા વીડિયો અપલોડ કર્યા હતા. નેન્સી ગ્રેવાલ માત્ર યુટ્યુબર જ નહોતી પણ પંજાબ અને ભારત-કેનેડા સંબંધોને લગતા મુદ્દાઓ પર પણ ખુલ્લેઆમ વાત કરી હતી.
નેન્સીએ ભારત અને કેનેડા વચ્ચે વધતા તણાવ પર વાત કરી હતી અને ખાલિસ્તાની વિચારધારાની સખત નિંદા કરી હતી. આ ઉપરાંત, તેણીએ જેલમાં બંધ સાંસદ અમૃતપાલ સિંહ, અકાલી દળના નેતા બિક્રમ સિંહ મજીઠિયા અને ડેરા બિયાસના વડા ગુરિન્દર સિંહ ધિલ્લોન સામે પણ અવાજ ઉઠાવ્યો હતો. વધુમાં, તેણીએ ન્યાય માટે પણ લડત આપી હતી. જૂન ૨૦૨૫ માં, જ્યારે ભટિંડા પ્રભાવશાળી કંચન કુમારી, જેને કમલ કૌર ભાભી તરીકે પણ ઓળખવામાં આવે છે, તેનું અચાનક અવસાન થયું, ત્યારે નેન્સીએ તેના માટે ન્યાયની માંગ કરી હતી.
નેન્સી ગ્રેવાલની ઇન્સ્ટાગ્રામ પરની છેલ્લી પોસ્ટમાં, તેણીએ શ્રી અકાલ તખ્ત સાહિબના જથેદાર વિશે વિવાદાસ્પદ ટિપ્પણીઓ કરી હતી. તેમાં, તેણીએ સતનામ સિંહ નામના વ્યક્તિના નિવેદનને સમર્થન આપ્યું હતું. તેણી અકાલ તખ્ત જથેદારને ચેતવણી આપતી જાવા મળી હતી કે જ્યારે જનતા એકઠી થશે અને સાચા શીખો ભેગા થશે, ત્યારે તેઓ તેમને છોડશે નહીં. તેણીએ અકાલ તખ્ત જથેદારના કપડાં વિશે પણ ઘણી વિવાદાસ્પદ ટિપ્પણીઓ કરી હતી. આ વિડિઓ તેણીની હત્યાના છ દિવસ પહેલા, ૩ ફેબ્રુઆરીનો છે.
