કેન્દ્રીય ગૃહમંત્રી અમિત શાહે સોમવારે જયપુર પ્રદર્શન અને કન્વેન્શન સેન્ટર ખાતે આયોજિત ત્રણ નવા ફોજદારી કાયદાઓ પર રાજ્ય સ્તરીય પ્રદર્શનનું ઉદ્ઘાટન કર્યું. આ પ્રસંગે, તેમણે રાજસ્થાન સરકારની ઔદ્યોગિક અને રોકાણ સિદ્ધિઓની ખુલ્લેઆમ પ્રશંસા કરી.શાહે કહ્યું કે રાજસ્થાનમાં યોજાયેલી “રાઇઝિંગ રાજસ્થાન” રોકાણ સમિટની સફળતાએ સાબિત કર્યું છે કે રાજ્ય હવે ઉદ્યોગ અને રોકાણનું મુખ્ય કેન્દ્ર બની ગયું છે. ભૂતપૂર્વ મુખ્યમંત્રી અશોક ગેહલોતના નિવેદનનો ઉલ્લેખ કરતા તેમણે કહ્યું, “ગેહલોત પૂછતા હતા કે ૩૫ લાખ કરોડ રૂપિયાના કેટલા એમઓયુ અમલમાં મૂકવામાં આવશે. હું તેમને કહેવા માંગુ છું કે આજે ૩ લાખ કરોડ રૂપિયાના એમઓયુ અમલમાં મૂકવામાં આવ્યા છે, અને ૪ લાખ કરોડ રૂપિયાના એમઓયુનો શિલાન્યાસ સમારોહ આજે યોજાઈ રહ્યો છે.”અમિત શાહે મુખ્યમંત્રી ભજનલાલ શર્માની પ્રશંસા કરતા કહ્યું કે તેમના નેતૃત્વમાં રાજસ્થાને રોકાણ અને વિકાસ બંને મોરચે નોંધપાત્ર પ્રગતિ કરી છે. તેમણે કહ્યું, “ભજનલાલ શર્માએ ઉત્તમ કામ કર્યું છે. અમારી સરકાર જે કહે છે તે કરે છે, અને જે કરે છે તે જ કહે છે.”તેમણે રાજ્યના ઉદ્યોગ મંત્રી કર્નલ રાજ્યવર્ધન સિંહ રાઠોડની પણ પ્રશંસા કરતા કહ્યું કે તેઓ આ સિદ્ધિ માટે પ્રશંસાને પાત્ર છે. તેમણે બંને નાયબ મુખ્યમંત્રીઓના યોગદાનની પણ પ્રશંસા કરી અને સમગ્ર રાજસ્થાન મંત્રીમંડળને અભિનંદન આપ્યા.ત્રણ નવા કાયદાઓ પર પ્રદર્શનની પ્રશંસા કરતા શાહે કહ્યું કે આ પ્રદર્શન અત્યંત માહિતીપ્રદ અને શૈક્ષણિક છે. તેમણે મુખ્યમંત્રીને દિવાળી સુધી પ્રદર્શન લંબાવવા વિનંતી કરી જેથી વધુ લોકો તેનો લાભ લઈ શકે.શાહે કહ્યું કે દરેક અધિકારી, વકીલ અને કાયદાના વિદ્યાર્થીએ આ પ્રદર્શનની મુલાકાત લેવી જાઈએ. તેમણે સામાન્ય નાગરિકોને પણ વિનંતી કરી કે તેઓ આવે અને શીખે કે કેન્દ્ર સરકાર દ્વારા ઘડવામાં આવેલા ત્રણ નવા ફોજદારી કાયદાઓ સામાન્ય લોકોની સુવિધામાં અને ન્યાય વ્યવસ્થાને મજબૂત બનાવવામાં કેવી રીતે ફાળો આપી રહ્યા છે.
