અમરેલીમાં તા. ૧૫ નવેમ્બર, ૨૦૨૬ના રોજ જિલ્લા કક્ષાએ જનજાતિય ગૌરવ દિવસની ઉજવણી કરવામાં આવશે. શાંતાબા મેડિકલ કોલેજના ઓડિટોરિયમમાં સવારે ૧૦ઃ૩૦ કલાકે કાર્યક્રમનો પ્રારંભ થશે, જેમાં ૧,૦૦૦થી વધુ લોકો ઉપસ્થિત રહેવાની સંભાવના છે. કાર્યક્રમની વિગતો આપવા જિલ્લા વિકાસ અધિકારી રાજેશ કુમાર મૌર્યના અધ્યક્ષસ્થાને પત્રકાર પરિષદ યોજાઈ હતી. તેમણે આદિવાસી સમાજના ગૌરવશાળી ઇતિહાસ, સંસ્કૃતિ અને સ્વાતંત્ર્ય સંગ્રામમાં આપેલા યોગદાન અંગે માહિતી આપી હતી. ભગવાન બિરસા મુંડાની જન્મજયંતિ નિમિત્તે દર વર્ષે ૧૫ નવેમ્બરે આ દિવસ ઉજવાય છે. વર્ષ ૨૦૨૧માં ભારત સરકારે તેને રાષ્ટ્રીય સ્તરે ઉજવવાની જાહેરાત કરી હતી.