ભારતીય ટીમે નવો ઇતિહાસ રચ્યો. ફાઇનલમાં ન્યુઝીલેન્ડને હરાવીને, ભારતીય ટીમ ત્રીજી વખત ટી ૨૦ વર્લ્ડ કપનો ખિતાબ જીતવામાં સફળ રહી. ટીમ ઇન્ડિયાની ઐતિહાસિક જીત બાદ, અભિનંદનનો વરસાદ થઈ રહ્યો છે, પરંતુ એક સંદેશ સામે આવ્યો છે જેણે ચાહકોને ઉત્સાહિત કર્યા છે. ભૂતપૂર્વ ભારતીય કેપ્ટન એમએસ ધોની, જે ઘણીવાર સોશિયલ મીડિયા પર મૌન રહે છે, તેમણે ટીમ ઈન્ડિયાને એક અનોખા અંદાજમાં અભિનંદન આપ્યા છે. તેમનો આ સંકેત હવે સોશિયલ મીડિયા પર ઝડપથી વાયરલ થઈ રહ્યો છે. સોશિયલ મીડિયા પર ભાગ્યે જ સક્રિય રહેતા ધોનીએ લગભગ બે વર્ષ પછી ઈન્સ્ટાગ્રામ પર પોસ્ટ કરી છે. ટી૨૦ વર્લ્ડ કપ ચેમ્પિયન તરીકે ભારતની જીત બાદ, તેણે ટીમ ઇન્ડિયા અને સપોર્ટ સ્ટાફની પ્રશંસા કરી.
અમદાવાદના નરેન્દ્ર મોદી સ્ટેડિયમ ખાતે રમાયેલી ફાઇનલમાં, ભારતે ન્યૂઝીલેન્ડને એકતરફી રીતે હરાવીને ઇતિહાસ રચ્યો. પહેલા બેટિંગ કરતા, ભારતીય ટીમે ૨૫૫ રનનો વિશાળ સ્કોર બનાવ્યો. જવાબમાં, ન્યૂઝીલેન્ડ ૧૫૯ રનમાં ઓલઆઉટ થઈ ગયું, અને ભારતે ૯૬ રનથી મેચ જીતીને પોતાનો ત્રીજા ટી૨૦ વર્લ્ડ કપ ખિતાબ મેળવ્યો.
ટીમ ઇન્ડિયા ની પ્રભાવશાળી જીત બાદ, ધોનીએ ઈન્સ્ટાગ્રામ પર એક ભાવનાત્મક પોસ્ટ લખી, જેમાં ખેલાડીઓ અને સપોર્ટ સ્ટાફની પ્રશંસા કરી. તેમણે લખ્યું, “અમદાવાદમાં ઇતિહાસ રચાયો છે. ટીમ, સપોર્ટ સ્ટાફ અને વિશ્વભરમાં ભારતીય ક્રિકેટ ટીમના તમામ ચાહકોને ખૂબ ખૂબ અભિનંદન. તમને બધાને રમતા જાઈને આનંદ થયો. કોચ, તમારું સ્મિત તમારા પર ખૂબ જ સરસ લાગે છે. સ્મિત સાથે ગતિ એક મહાન સંયોજન છે. શાબાશ. મજા કરો મિત્રો. જા હું બુમરાહ વિશે કંઈ ન લખું તો શ્રેષ્ઠ રહેશે. ચેમ્પ્યન બોલર.”
ભૂતપૂર્વ ભારતીય કેપ્ટન મહેન્દ્ર સિંહ ધોનીની આ પોસ્ટ સોશિયલ મીડિયા પર ઝડપથી વાયરલ થઈ ગઈ, અને ચાહકો તેમના મનપસંદ કેપ્ટનની આ પોસ્ટને લાઈક, ટિપ્પણી અને શેર કરી રહ્યા છે. ધોનીની કેપ્ટનશીપ હેઠળ, ભારતીય ટીમે ૨૦૦૭ માં તેનું પહેલું ટાઇટલ જીત્યું. ત્યારબાદ, ૨૦૨૪ માં, રોહિત શર્માની કેપ્ટનશીપ હેઠળ ભારતીય ટીમે તેનું બીજું ટાઇટલ જીત્યું.
