ગાંધીનગર મહાનગરપાલિકાની ૧૧ વોર્ડની કુલ ૪૪ બેઠકોની ચૂંટણીમાં ભાજપે ૩૮ બેઠકો મેળવીને ભવ્ય વિજય નોંધાવ્યો છે, જ્યારે આ વખતે આમ આદમી પાર્ટીનો સફાયો થયો છે. બીજી તરફ, વર્ષ ૨૦૨૧ની ચૂંટણીમાં માત્ર ૨ બેઠકો મેળવનાર કોંગ્રેસે ૨૦૨૬માં ૫ બેઠકો જીતીને વાપસી કરી છે, જેમાં વોર્ડ નંબર ૬માં કોંગ્રેસની આખી પેનલ વિજેતા બની છે.
ઉલ્લેખનીય છે કે, ૨૦૨૧માં ભાજપે ૪૧ બેઠકો સાથે ગાંધીનગર મનપાના ઇતિહાસની સૌથી મોટી જીત મેળવી હતી, જ્યારે કોંગ્રેસને ૨ અને છછઁને ૧ બેઠક મળી હતી. આ વખતે કોંગ્રેસના પ્રદર્શનમાં સુધારો થયો હોવા છતાં, સંગઠનાત્મક નબળાઈ, બૂથ સ્તરે મજબૂત માળખાનો અભાવ, નેતાઓ વચ્ચે સંકલનની કમી, પૂર્વ કોર્પોરેટરોનો પક્ષપલટો અને જનતાને આકર્ષવામાં નિષ્ફળ રહેલો મેનિફેસ્ટો જેવા કારણો ચૂંટણીમાં તેની હાર માટે જવાબદાર રહ્યા છે.
વર્ષ ૨૦૨૧ની મનપા ચૂંટણીની સરખામણીએ આ વખતે કોંગ્રેસનું પ્રદર્શન થોડું સુધર્યું હોય એવું ચિત્ર સામે આવ્યું છે. વર્ષ ૨૦૨૧ની ગાંધીનગર મનપાની ચૂંટણીમાં સ્થાપના પછી ભાજપ માટે સૌથી મોટી જીત સાબિત થઈ હતી, જેમાં ભાજપે ૪૧ બેઠકો જીતી હતી. તે સમયે વિરોધ પક્ષ કોંગ્રેસના સૂપડા સાફ થઈ ગયા હતા અને પક્ષ માત્ર ૨ બેઠકો પર સમેટાઈ ગયો હતો, જ્યારે આમ આદમી પાર્ટીએ પ્રથમ વખત એન્ટ્રી કરીને ૧ બેઠક પર જીત મેળવી હતી.
વર્ષ ૨૦૨૬ની ચૂંટણીમાં ગાંધીનગર મનપાની ચૂંટણીના પરિણામોમાં કોંગ્રેસે વાપસી કરતા ૫ બેઠકો પર વિજય મેળવ્યો છે. પક્ષ માટે સૌથી મોટા સમાચાર વોર્ડ નંબર ૬ માંથી આવ્યા છે, જ્યાં કોંગ્રેસની આખી પેનલ વિજેતા બની છે. જોકે, આ આંશિક સુધારા છતાં ભાજપે ૩૮ બેઠકો સાથે મહાનગરપાલિકા પર પોતાનું સંપૂર્ણ કબજા જમાવવામાં સફળતા મેલવી છે.
ગાંધીનગર મનપામાં કોગ્રેસે ૫ બેઠકો જીતી હોવા છતાં ગુજરાતની પેટાચૂંટણીઓમાં કોંગ્રેસને અપેક્ષિત સફળતા મળી નથી. પક્ષની આ હાર પાછળના કારણોની વાત કરીએ તો પાર્ટીના સંગઠનાત્મક અને વ્યૂહાત્મક કારણો જવાબદાર રહ્યા છે.
કોંગ્રેસ પાર્ટીમાં સંગઠનની નબળાઈ સ્પષ્ટ દેખાઈ આવી હતી અને ચૂંટણી લક્ષી તૈયારીઓ ખૂબ મોડી શરૂ કરવામાં આવી હતી.
ચૂંટણી જીતવા માટે સૌથી મહત્વપૂર્ણ ગણાતા બૂથ સ્તર સુધી મજબૂત અને સક્રિય માળખાનો પક્ષમાં અભાવ જાવા મળ્યો.
મોવડીમંડળ અને સ્થાનિક નેતાઓ વચ્ચે યોગ્ય સંકલન ન હોવાનો ફટકો પક્ષને સહન કરવો પડ્યો.
જનતામાં પક્ષ પ્રત્યે પુનઃ વિશ્વાસ ઊભો કરવામાં નેતૃત્વ નિષ્ફળ નીવડ્યું.અગાઉ કોંગ્રેસના જ ચૂંટાયેલા કોર્પોરેટરો દ્વારા કરવામાં આવેલા પક્ષપલટાની અસર પણ મતદારોના માનસ પર પડી.
પક્ષનો ચૂંટણી ઢંઢોળો (મેનિફેસ્ટો) સામાન્ય જનતા અને મતદારોને આકર્ષવામાં નિષ્ફળ રહ્યો. ઉલ્લેખનીય છે કે, ગાંધીનગર મનપાની ચૂંટણીના પરિણામો સ્પષ્ટ દર્શાવે છે કે ભાજપ ગાંધીનગરમાં પોતાનો ભગવો લહેરાવવામાં સફળ રહ્યો છે, જ્યારે કોંગ્રેસે ભૂતકાળની ભૂલોમાંથી શીખીને સંગઠનને બૂથ સ્તર સુધી મજબૂત કરવાની જરૂરિયાત સ્પષ્ટ થઈ છે.
