અમદાવાદ શહેરના ખોખરા વિસ્તારમાં મહિલાની હત્યાની ઘટના સામે આવતાં ચકચાર મચી ગઈ છે. જીવનરક્ષક ફ્લેટમાં રહેતી લક્ષ્મીબેન ડાભી નામની મહિલાનો મૃતદેહ તેમના જ ઘરમાંથી મળી આવ્યો હતો. પ્રાથમિક માહિતી મુજબ, મહિલાની હત્યા કર્યા બાદ મૃતદેહને સૂટકેસમાં ભરવાનો પ્રયાસ કરવામાં આવ્યો હોવાની વિગતો સામે આવી છે.
મળતી માહિતી અનુસાર, લક્ષ્મીબેન ડાભી ખોખરા વિસ્તારમાં આવેલા જીવનરક્ષક ફ્લેટમાં રહેતાં હતાં અને એકલવાયું જીવન જીવતાં હતાં. વહેલી સવારે તેમના ઘરમાંથી મૃતદેહ મળી આવતાં સમગ્ર વિસ્તારમાં ચકચાર મચી ગઈ હતી. મૃતદેહ વિઘટિત અવસ્થામાં મળી આવ્યો હોવાનું જાણવા મળ્યું છે.
ઘટનાની જાણ થતાં ખોખરા પોલીસ ઘટનાસ્થળે પહોંચી હતી અને તપાસ હાથ ધરી હતી. મહિલાની હત્યા કયા કારણોસર કરવામાં આવી અને આ ગુનામાં કોણ સંડોવાયેલું છે તે દિશામાં પોલીસ તપાસ કરી રહી છે. મૃતદેહને સૂટકેસમાં ભરવાનો પ્રયાસ કેમ કરવામાં આવ્યો હતો તે સહિતના મુદ્દાઓ પણ તપાસના દાયરામાં છે.
હાલમાં હત્યા પાછળનું ચોક્કસ કારણ અને આરોપી અંગેની વિગતો સામે આવવાની બાકી છે. પોલીસ તપાસ આગળ વધતાં સમગ્ર ઘટનાનો ખુલાસો થવાની શક્યતા છે.
