પશ્ચિમ એશિયામાં ચાલી રહેલા સંઘર્ષને ધ્યાનમાં રાખીને, સંરક્ષણ પ્રધાન રાજનાથ સિંહે મંગળવારે કહ્યું કે હોર્મુઝ સ્ટ્રેટમાં શિપિંગમાં વિક્ષેપો એ કોઈ દૂરની ઘટના નથી પરંતુ એક કઠોર વાસ્તવિકતા છે જે ભારતની સુરક્ષા અને આર્થિક સ્થિરતાને સીધી અસર કરે છે. જર્મનીની ત્રણ દિવસની મુલાકાતના પહેલા દિવસે સંરક્ષણ અને સુરક્ષા અંગેની સંસદીય સ્થાયી સમિતિને સંબોધતા સિંહે આ નિવેદન આપ્યું હતું.
સંરક્ષણ મંત્રી રાજનાથ સિંહની જર્મનીની મુલાકાત એવા સમયે થઈ રહી છે જ્યારે પશ્ચિમ એશિયામાં સંઘર્ષ ૫૦ દિવસથી વધુ સમયથી ચાલી રહ્યો છે અને તેના વૈશ્વિક પરિણામો બહાર આવી રહ્યા છે. રાજનાથ સિંહે કહ્યું, “ભારત જેવા વિકાસશીલ દેશ માટે, હોર્મુઝ સ્ટ્રેટમાં વિક્ષેપ એ કોઈ દૂરની ઘટના નથી પરંતુ એક ગંભીર વાસ્તવિકતા છે જેની સીધી અસર આપણી સુરક્ષા અને આર્થિક સ્થિરતા પર પડે છે.” તેમણે નોંધ્યું કે ભારત તેની ઉર્જા જરૂરિયાતોના નોંધપાત્ર ભાગ માટે પશ્ચિમ એશિયાઈ ક્ષેત્ર પર નિર્ભર છે.
રાજનાથ સિંહે પશ્ચિમ એશિયાની પરિસ્થિતિ માટે ભારતની વ્યૂહરચના પણ રજૂ કરી. તેમણે સમજાવ્યું કે ભારતે મંત્રીઓના જૂથની રચના કરી છે જે પરિસ્થિતિ પર સતત નજર રાખી રહ્યું છે. તેનો ઉદ્દેશ્ય ઉર્જા પુરવઠો જાળવવાનો, આવશ્યક ચીજવસ્તુઓની ઉપલબ્ધતા સુનિશ્ચિત કરવાનો અને ફુગાવાને નિયંત્રિત કરવાનો છે. તેમણે કહ્યું કે વર્તમાન ભૂ-રાજકીય કટોકટી હવે પ્રાદેશિક નથી, પરંતુ વૈશ્વિક સ્તરે ઉર્જા, ખાદ્ય સુરક્ષા અને આર્થિક સ્થિરતાને અસર કરી રહી છે.
તેમણે એમ પણ કહ્યું કે આજે વિશ્વ નવા સુરક્ષા જાખમોનો સામનો કરી રહ્યું છે, અને ટેકનોલોજીકલ પરિવર્તને પરિસ્થિતિને અત્યંત જટિલ અને એકબીજા સાથે જાડાયેલી બનાવી દીધી છે. રાજનાથ સિંહે કહ્યું કે બદલાતા વાતાવરણને અનુરૂપ બનવાની તૈયારી સાથે એક નવો અભિગમ અપનાવવાની જરૂર છે. સંરક્ષણ મંત્રી સિંહે ભારત અને જર્મનીના સંરક્ષણ ઔદ્યોગિક ઇકોસિસ્ટમ વચ્ચે સહકાર વધારવાની પણ ભારપૂર્વક હિમાયત કરી.
તેમણે કહ્યું કે જર્મનીની ઔદ્યોગિક ક્ષમતાઓ અને ભારતના સ્ટાર્ટઅપ ઇકોસિસ્ટમનું સંયોજન બંને દેશોને સંરક્ષણ ઉત્પાદનમાં નવી ઊંચાઈઓ પર લઈ જઈ શકે છે. વધુમાં, જર્મન ચાન્સેલર ફ્રેડરિક મેર્ઝ અને વડા પ્રધાન નરેન્દ્ર મોદીના નેતૃત્વમાં, બંને દેશો વચ્ચે વ્યૂહાત્મક સહયોગ સતત મજબૂત થઈ રહ્યો છે.
