રણવીર સિંહ અને આદિત્ય ધારની ફિલ્મ ‘ધુરંધર’ એ થિયેટરોમાં ઐતિહાસિક સફળતા મેળવી અને હવે ઓટીટી પ્લેટફોર્મ પર ધૂમ મચાવી રહી છે. આ સ્પાય થ્રીલર, જેને પાકિસ્તાની થિયેટરોમાં રિલીઝ થવાની મંજૂરી આપવામાં આવી ન હતી, તે હવે નેટફલીક્સ પાકિસ્તાન પર નંબર વન ફિલ્મ બની ગઈ છે. “ધુરંધર” ૩૦ જાન્યુઆરીએ સ્ટ્રીમિંગ પ્લેટફોર્મ પર આવી અને થોડા દિવસોમાં જ પડોશી દેશમાં ટોચના સ્થાને પહોંચી ગઈ. આ ફિલ્મ પાકિસ્તાનમાં લ્યારી શહેર અને ત્યાંના માફિયા ગેંગના કામકાજના ચિત્રણને કારણે પહેલાથી જ સૌથી વધુ ચર્ચિત ફિલ્મોમાંની એક બની ગઈ હતી. કારણ કે તે દેશના સિનેમાઘરોમાં રિલીઝ થઈ ન હતી, તેથી લોકો તેને જોવા માટે ઉત્સુક હતા, અને તેથી જ તે હવે વાયરલ થઈ ગઈ છે.
નેટફલીક્સ ટુડુમના અપડેટેડ ડેટા અનુસાર, “ધૂરંધર” ૨૬ જાન્યુઆરીથી ૧ ફેબ્રુઆરીના અઠવાડિયા માટે પાકિસ્તાનમાં નંબર ૧ ફિલ્મ હતી. નોંધનીય છે કે આ ફિલ્મ ૩૦ જાન્યુઆરીએ પ્લેટફોર્મ પર આવી હતી, જેનાથી તે ફક્ત ત્રણ દિવસમાં અઠવાડિયાની સૌથી વધુ જાવાયેલી ફિલ્મ બની હતી. યાદીમાં બીજા અને ત્રીજા સ્થાને ભારતીય ફિલ્મો પણ છેઃ ધનુષ અને કૃતિ સેનનની “તેરે ઇશ્ક મેં” અને ઇમરાન હાશ્મી અને યામી ગૌતમની “હક”. દરમિયાન, બાંગ્લાદેશ અને શ્રીલંકામાં, રણવીર સિંહ અભિનીત આ ફિલ્મ અઠવાડિયાની બીજી સૌથી વધુ જોવાયેલી ફિલ્મ છે. આ અઠવાડિયે તે ટોચના સ્થાને પહોંચવાની અપેક્ષા છે.
પાકિસ્તાન અને ભારત ઉપરાંત, ધુરંધર પાંચ અન્ય દેશોમાં પણ ચાર્ટમાં ટોચ પર છેઃ બહેરીન, સંયુક્ત આરબ અમીરાત, કતાર, ઓમાન અને મોરેશિયસ. નોંધનીય છે કે આ ફિલ્મ મોરેશિયસ સિવાય આમાંથી કોઈ પણ દેશમાં થિયેટરમાં રિલીઝ થઈ ન હતી. આ આદિત્ય ધર દ્વારા નિર્દેશિત આ ફિલ્મને મળેલા અભૂતપૂર્વ જાહેર પ્રતિસાદને પ્રતિબિંબિત કરે છે, જેમાં અક્ષય ખન્ના, સંજય દત્ત, અર્જુન રામપાલ, આર. માધવન અને સારા અર્જુન પણ છે. ભારતમાં, આ ફિલ્મે ફક્ત બોક્સ ઓફિસ પર જ નહીં, પરંતુ ઓટીટી પ્લેટફોર્મ પર પણ નવા રેકોર્ડ બનાવ્યા છે. અહેવાલો અનુસાર, ફિલ્મે તેના પહેલા ત્રણ દિવસમાં ૭.૬ મિલિયન વ્યૂઝ મેળવ્યા છે, જે અત્યાર સુધીનો સૌથી વધુ છે. આ ફિલ્મ એનિમલ, ફાઇટર અને પુષ્પા ૨ઃ ધ રૂલ જેવી ફિલ્મોના ઓપનિંગ વ્યૂઝને વટાવી ગઈ છે.
બધાની નજર હવે સિક્વલ, ધુરંધરઃ ધ રિવેન્જ પર છે, જેનું પહેલું ટીઝર તાજેતરમાં રિલીઝ થયું હતું. ધુરંધર ૨ ૧૯ માર્ચે વિશ્વભરમાં રિલીઝ થવાની છે. ભારતમાં થયેલા ઘાતક આતંકવાદી હુમલાનો બદલો લેવા માટે દર્શકો હમઝા અલી મજારી ઉર્ફે જસકીરત સિંહ રંગીની આતુરતાથી રાહ જોઈ રહ્યા છે. ધુરંધર ૨ બોક્સ ઓફિસ પર આવી જ ધમાલ મચાવી શકે છે કે કેમ તે જોવાનું બાકી છે.
