દેશમાં સતત ભારે વરસાદને કારણે, ઘણા રાજ્યોમાં પરિસ્થિતિ ખૂબ જ ગંભીર છે. પંજાબ, જમ્મુ અને કાશ્મીર, હિમાચલ પ્રદેશ અને ઉત્તરાખંડમાં પૂરને કારણે પરિસ્થિતિ ગંભીર છે. પંજાબના તમામ ૨૩ જિલ્લાઓમાં ૧૪૦૦ થી વધુ ગામો પૂરની ઝપેટમાં આવ્યા છે. રાજ્યની પરિસ્થિતિને ધ્યાનમાં રાખીને, પંજાબ સરકારે સમગ્ર રાજ્યને આપત્તિગ્રસ્ત જાહેર કર્યું છે.
પંજાબના મંત્રી હરજાત સિંહ બેન્સે સોશિયલ મીડિયા પર એક પોસ્ટ દ્વારા માહિતી આપી હતી કે રાજ્યમાં શાળાઓ, કોલેજા, યુનિવર્સિટીઓ સહિત તમામ શૈક્ષણિક સંસ્થાઓ ૭ સપ્ટેમ્બર સુધી બંધ રહેશે. તેમણે લખ્યું, ‘પંજાબના મુખ્યમંત્રી ભગવંત સિંહ માનના નિર્દેશ મુજબ, પૂરની પરિસ્થિતિને ધ્યાનમાં રાખીને, પંજાબમાં તમામ સરકારી, સહાયિત અથવા માન્ય અને ખાનગી શાળાઓ, કોલેજા, યુનિવર્સિટીઓ અને પોલિટેકનિક ૭ સપ્ટેમ્બર સુધી બંધ રહેશે.’
કોંગ્રેસ નેતા રાહુલ ગાંધીએ સોશિયલ મીડિયા પર એક વીડિયો શેર કર્યો અને પૂરગ્રસ્ત લોકો પ્રત્યે દુઃખ વ્યક્ત કર્યું. પ્રધાનમંત્રી મોદીને અપીલ કરતા તેમણે કહ્યું, ‘મોદીજી, પંજાબમાં પૂરે ભયંકર વિનાશ મચાવ્યો છે. જમ્મુ-કાશ્મીર, હિમાચલ અને ઉત્તરાખંડમાં પણ પરિસ્થિતિ ખૂબ જ ચિંતાજનક છે. આવા મુશ્કેલ સમયમાં, કેન્દ્ર સરકારનું ધ્યાન અને મદદ ખૂબ જ મહત્વપૂર્ણ છે. હજારો પરિવારો પોતાના ઘર, જીવ અને પ્રિયજનોને બચાવવા માટે સંઘર્ષ કરી રહ્યા છે. વધુમાં, તેમણે કહ્યું કે હું વિનંતી કરું છું કે આ રાજ્યો માટે, ખાસ કરીને ખેડૂતો માટે તાત્કાલિક એક ખાસ રાહત પેકેજ જાહેર કરવામાં આવે અને રાહત અને બચાવ કામગીરી ઝડપી બનાવવામાં આવે.
પંજાબમાં સતત ભારે વરસાદને કારણે, રાજ્યના મોટાભાગના જિલ્લાઓ ખરાબ રીતે પ્રભાવિત થયા છે. આ ભયંકર પૂરને કારણે, ઘણા લોકોના જીવન ખરાબ રીતે પ્રભાવિત થયા છે. રાજ્યમાં પૂરને કારણે અત્યાર સુધીમાં ત્રીસ લોકોએ જીવ ગુમાવ્યા છે. સ્થાનિક વહીવટીતંત્ર અને સેના રાહત કાર્યમાં રોકાયેલા છે.
પંજાબના મુખ્યમંત્રી ભગવંત માને તાજેતરમાં રાજ્યની પરિસ્થિતિને જાતા, પ્રધાનમંત્રી નરેન્દ્ર મોદી પાસેથી ૬ હજાર કરોડ રૂપિયાની કટોકટી સહાયની માંગ કરી છે. પંજાબ પોલીસ અધિકારીઓએ મુખ્યમંત્રી રાહત ભંડોળમાં એક દિવસનો પગાર દાનમાં આપવાનું વચન આપ્યું છે. પંજાબ સરકાર પૂરગ્રસ્ત લોકોને શક્ય તેટલી મદદ પૂરી પાડવાનો પ્રયાસ કરી રહી છે.
