ટી૨૦ વર્લ્ડ કપની ફાઇનલ ૮ માર્ચે અમદાવાદના નરેન્દ્ર મોદી સ્ટેડિયમ ખાતે રમાશે. આ મેચ ભારત અને ન્યુઝીલેન્ડ વચ્ચે થશે. નરેન્દ્ર મોદી સ્ટેડિયમ અત્યાર સુધી ટીમ ઈન્ડિયા માટે કમનસીબ સાબિત થયું છે. આ મેદાન પર ટીમ ઈન્ડિયાને ઘણી મોટી મેચોમાં હારનો સામનો કરવો પડ્યો છે. આવી સ્થિતિમાં, આ ઐતિહાસિક ફાઇનલ મેચ પહેલા, ટીમ ઇન્ડિયાએ એક અનોખો નિર્ણય લીધો છે, જેને તમે અંધશ્રદ્ધા તરીકે પણ જાઈ શકો છો. ફાઇનલ પહેલા, ટીમ ઇન્ડિયાએ તેના રહેઠાણ એટલે કે હોટેલમાં ફેરફાર કર્યો છે.
રિપોર્ટ્સ અનુસાર, ફાઇનલ મેચ પહેલા ભારતીય ટીમની હોટેલમાં ફેરફાર કરવામાં આવ્યો છે. એવું માનવામાં આવે છે કે આ નિર્ણય નકારાત્મક ઇતિહાસનો અંત લાવવા અને નવી શરૂઆત કરવા માટે લેવામાં આવ્યો છે. અહેવાલો અનુસાર, ટીમ હવે તે હોટેલમાં રહેશે નહીં જ્યાં તે ૨૦૨૩ વર્લ્ડ કપ ફાઇનલ દરમિયાન રોકાઈ હતી. આ ફેરફારના કારણ અંગે કોઈ સત્તાવાર માહિતી જાહેર કરવામાં આવી નથી.
નોંધનીય છે કે ૨૦૨૩ વનડે વર્લ્ડ કપ પછી, ટીમ ઇન્ડિયા આઇસીસી ટુર્નામેન્ટમાં ફક્ત બે મેચ હારી છે. તે બંને હાર આ જ મેદાન પર આવી હતી. ભારતે ૨૦૨૩ વનડે વર્લ્ડ કપની ફાઇનલ આ જ મેદાન પર રમી હતી, પરંતુ ઓસ્ટ્રેલિયા સામે હારી ગઈ હતી. ત્યારબાદ ટીમ ઈન્ડિયાએ આ વર્લ્ડ કપમાં દક્ષિણ આફ્રિકા સામે સુપર ૮ મેચ રમી હતી, અને ત્યાં પણ હારી ગઈ હતી. બંને વખત, ટીમ ઈન્ડિયા એક જ હોટેલમાં રહી હતી. તેથી, ટીમ ઈન્ડિયા આ વખતે ફાઇનલ માટે કોઈ કસર છોડવા માંગે છે.
ટીમ ઈન્ડિયાએ નરેન્દ્ર મોદી સ્ટેડિયમ ખાતે અત્યાર સુધીમાં ૧૦ ટી૨૦ મેચ રમી છે. આ સમયગાળા દરમિયાન, ટીમ ઈન્ડિયાએ ૭ મેચ જીતી છે અને બાકીની ૩ હારનો સામનો કરવો પડ્યો છે. ભારતે આ વર્લ્ડ કપમાં અહીં ૨ મેચ પણ રમી છે. ટીમ ઈન્ડિયાએ નેધરલેન્ડ્સને ૧૭ રનથી હરાવ્યું હતું, પરંતુ સુપર ૮માં દક્ષિણ આફ્રિકા સામે ૭૬ રનથી હારી ગયું હતું. ટીમ ઈન્ડિયા આ વર્લ્ડ કપમાં અત્યાર સુધી ફક્ત એક જ મેચ હારી છે. હવે જાવાનું એ રહે છે કે ટીમ ઈન્ડિયા ફાઇનલમાં ન્યુઝીલેન્ડ સામે કેવું પ્રદર્શન કરે છે.
