ગુજરાતનો શહેરી વિકાસ વિભાગ આ મહત્વાકાંક્ષી પ્રોજેક્ટ માટે ટેકનિકલ વિગતો તૈયાર કરી રહ્યું છે, જે સાણંદને અમદાવાદ સાથે, સાવલીને વડોદરા સાથે, કલોલને ગાંધીનગર સાથે, બારડોલીને સુરત સાથે અને હિરાસરને રાજકોટ સાથે જાડશે.
ગુજરાતમાં અમદાવાદ અને સાણંદ વચ્ચે પ્રથમ આરઆરટીએસ કોરિડોર વિકસાવવામાં આવશે. ટૂંક સમયમાં ટેકનિકલ બિડ મંગાવવામાં આવે તેવી અપેક્ષા છે. વસ્તી વિસ્ફોટ સાથે, શહેરો પર વધુ પડતું ભારણ છે. દબાણ ઓછું કરવા માટે, ગુજરાતે પાંચ સેટેલાઇટ ટાઉન બનાવવાનો નિર્ણય લીધો છે. “વધુ સારી પરિવહન સુવિધાઓ લોકોને સેટેલાઇટ ટાઉનમાં સ્થળાંતર કરવાનો વિકલ્પ પૂરો પાડશે જ્યાં તેમને રોજગારી મળે છે,” એક વરિષ્ઠ અધિકારીએ જણાવ્યું.
ભારતમાં, રાષ્ટ્રીય રાજધાની ક્ષેત્રમાં આરઆરટીએસ વિકસાવવામાં આવી રહ્યું છે અને બે વર્ષ પહેલાં મેરઠ સુધીની પ્રથમ લાઇનનું ઉદ્ઘાટન કરવામાં આવ્યું હતું. આમ એનસીઆર પછી આરઆરટીએસ નેટવર્ક ધરાવતું ગુજરાત બીજું રાજ્ય હશે. કેન્દ્ર સરકારે આ વર્ષને “શહેરી વર્ષ” જાહેર કર્યું હોવાથી, માળખાગત સુવિધાઓ અને અન્ય સુવિધાઓના વિકાસ માટે રાજ્યોને ભંડોળ ફાળવ્યું છે.
અમદાવાદ અને સુરતમાં મેટ્રો રેલ નેટવર્ક છે, જે શહેરની મર્યાદામાં કાર્યરત છે. આરઆરટીએસ નો ઉદ્દેશ્ય શહેરો અને સેટેલાઇટ નગરો વચ્ચે સરળતાથી અવરજવર માટે શહેરની સીમાઓની બહાર કનેક્ટવિટી પૂરી પાડવાનો છે.
ગુજરાત કોમનવેલ્થ અને ઓલમ્પિક માટે લક્ષ્ય રાખતું હોવાથી, રાજ્યના અર્થતંત્રને વેગ આપવા માટે વધુ સારા પરિવહન અને સુવિધાઓની જરૂર છે.આરઆરટીએસનો ઉદ્દેશ્ય આર્થિક પ્રવૃત્તિમાં વધારો, રોજગાર અને શિક્ષણની પહોંચમાં સુધારો અને વાહનોનું પ્રદૂષણ ઘટાડવાનો છે.
