ઇઝરાયલે કેનેડિયન પ્રતિનિધિમંડળને કબજા હેઠળના પશ્ચિમ કાંઠે પ્રવેશતા અટકાવ્યું છે. પ્રતિનિધિમંડળમાં સંસદના છ સભ્યોનો સમાવેશ થાય છે. કેનેડામાં ઇઝરાયલી દૂતાવાસે જણાવ્યું હતું કે આ જૂથને ઇસ્લામિક રિલીફ વર્લ્ડવાઇડ સાથેના સંબંધો હોવાને કારણે પ્રવેશ નકારવામાં આવ્યો હતો, જે એક બિન-સરકારી સંસ્થા છે જેને ઇઝરાયલ આતંકવાદી જૂથ માને છે. કેનેડાના વિદેશ પ્રધાન અનિતા આનંદે સોશિયલ મીડિયા પર પોસ્ટ કરીને જણાવ્યું હતું કે કેનેડાએ આ દુર્વ્યવહાર સામે પોતાનો વાંધો વ્યક્ત કર્યો છે.
ઓન્ટારિયોના સંસદ સભ્ય ઇકરા ખાલિદ, જે વડા પ્રધાન માર્ક કાર્નીની લિબરલ પાર્ટી સાથે જાડાયેલા છે, તેમણે કહ્યું કે તેઓ પ્રતિનિધિમંડળનો ભાગ હતા અને ઇઝરાયલી સરહદ અધિકારીઓ દ્વારા તેમને ઘણી વખત દબાણ કરવામાં આવ્યું હતું. તેમણે કહ્યું કે જ્યારે તેમણે આશરે ૩૦-વ્યક્તિના પ્રતિનિધિમંડળના સભ્યનું નિરીક્ષણ કરવાનો પ્રયાસ કર્યો ત્યારે તેમને દબાણ કરવામાં આવ્યું હતું, જેને જાર્ડન અને ઇઝરાયલી કબજા હેઠળના પશ્ચિમ કાંઠા વચ્ચે એલનબી સરહદ પાર કર્યા પછી વધારાની પૂછપરછ માટે એક બાજુ લઈ જવામાં આવ્યા હતા. ખાલિદે કહ્યું કે સરહદ અધિકારીઓ જોઈ શકતા હતા કે તેઓ સાંસદ છે કારણ કે તેઓએ તેમનો ખાસ પાસપોર્ટ લઈ લીધો હતો, જે પ્રમાણભૂત કેનેડિયન દસ્તાવેજથી અલગ દેખાય છે.
ઇઝરાયલી દૂતાવાસના નિવેદનમાં જણાવાયું છે કે ઇઝરાયલ આતંકવાદી સંસ્થાઓ સાથે સંકળાયેલા સંગઠનો અને વ્યક્તિઓને પ્રવેશ આપશે નહીં. નિવેદનમાં નોંધવામાં આવ્યું છે કે કેનેડિયન-મુસ્લીમ વોટને તેના ભંડોળનો નોંધપાત્ર હિસ્સો ઇસ્લામિક રિલીફ કેનેડા પાસેથી મળે છે, જે ઇસ્લામિક રિલીફ વર્લ્ડવાઇડની પેટાકંપની છે, જેને ઇઝરાયલ આતંકવાદી સંગઠન તરીકે સૂચિબદ્ધ કરે છે.
ધ કેનેડિયન-મુસ્લીમ વોટ ગ્રુપ દ્વારા પ્રાયોજિત આ પ્રતિનિધિમંડળ, પશ્ચિમ કાંઠે વિસ્થાપિત પેલેÂસ્ટનિયનો સાથે મળવાનું આયોજન કરી રહ્યું હતું, જ્યાં ઇઝરાયલી સરકારે તાજેતરમાં યહૂદી વસાહતોમાં ૭૬૪ નવા ઘરોના નિર્માણને મંજૂરી આપી હતી. ઓટ્ટાવામાં, કેનેડિયન મુસ્લીમોની રાષ્ટ્રીય પરિષદે જણાવ્યું હતું કે કેનેડિયન સાંસદોને પરવાનગી આપવાનો ઇનકાર ઇઝરાયલી સરકારની પારદર્શિતા અને જવાબદારી અંગે ગંભીર ચિંતાઓ ઉભી કરે છે.
બ્રિટિશ કોલંબિયાના ન્યૂ ડેમોક્રેટ સાંસદ જેની ક્વાનએ જણાવ્યું હતું કે સમગ્ર પ્રતિનિધિમંડળ પાસે પશ્ચિમ કાંઠે પ્રવેશવા માટે ઇલેક્ટ્રોનિક મુસાફરી પરવાનગીઓ હતી, પરંતુ તે તેમના આગમનના દિવસે જ રદ કરવામાં આવી હતી. સપ્ટેમ્બરમાં, કેનેડા પેલેસ્ટીનિયન રાજ્યને માન્યતા આપવામાં ઘણા અન્ય દેશોમાં જોડાયું, જે નીતિમાં એક મહત્વપૂર્ણ પરિવર્તન હતું જે યુનાઇટેડ સ્ટેટ્સના વિરોધ છતાં આવ્યું હતું. તે સમયે, કેનેડાએ જણાવ્યું હતું કે તેને આશા છે કે આ શાંતિનો માર્ગ મોકળો કરશે.
