અમરેલીના જાણીતા કેરિયર કાઉન્સિલર અને ‘ફૂલછાબ’ના લોકપ્રિય કારકિર્દી લેખક શ્રી દ્વારકાદાસ લલાડીયાનો એક પ્રેરણાદાયી કાર્યક્રમ આગામી ૨૮ માર્ચ, શનિવારના રોજ બપોરે ૨.૦૦ કલાકે ડીડી ગિરનાર પર પ્રસારિત થવા જઈ રહ્યો છે. દૂરદર્શન રાજકોટના સ્ટેશન ડાયરેક્ટર સલીમભાઈ સોમાણી દ્વારા લેવાયેલા આ રસપ્રદ ઇન્ટરવ્યૂમાં વેકેશનનો રચનાત્મક અને કેળવણીલક્ષી પ્રવૃત્તિઓમાં સદુપયોગ કેવી રીતે કરવો તે અંગે ઊંડાણપૂર્વક છણાવટ કરવામાં આવી છે. આ કાર્યક્રમમાં ખાસ કરીને સાંપ્રત સમયમાં માતા-પિતાની ફરજો અને બાળકના સર્વાંગી વિકાસ વિશે મહત્વનું માર્ગદર્શન આપવામાં આવ્યું છે. વિદ્યાર્થીઓના અભ્યાસ અને વર્તનલક્ષી સમસ્યાઓના ઉકેલ માટે વાલીઓની ભૂમિકા પર પણ વિશેષ ભાર મૂકવામાં આવ્યો છે. શિક્ષણપ્રેમીઓ, વિદ્યાર્થીઓ અને તમામ વાલીઓને આ માર્ગદર્શનનો મહત્તમ લાભ લેવા નમ્ર અનુરોધ કરવામાં આવ્યો છે.
