પોલીસે ન્યાયિક મેજિસ્ટ્રેટ સમક્ષ દલીલ કરી હતી કે વિરોધનો હેતુ દેશને આંતરરાષ્ટ્રીય સ્તરે બદનામ કરવાનો હતો. યુવા કોંગ્રેસના કાર્યકરોએ આંતરરાષ્ટ્રીય મહાનુભાવોની હાજરીમાં ભારત મંડપમ ખાતે વિરોધ પ્રદર્શન કર્યું હતું. દિલ્હી પોલીસ અને એડિશનલ પબ્લિક પ્રોસિક્યુંટેર (એપીપી) ની દલીલો સાંભળ્યા બાદ ન્યાયિક મેજિસ્ટ્રેટ ફર્સ્ટ ક્લાસ (જેએમએફસી) રવિએ આરોપીઓને પાંચ દિવસની કસ્ટડીમાં મોકલ્યા હતા.
ધરપકડ કરાયેલા કાર્યકરોમાં બિહારના યુથ કોંગ્રેસના રાષ્ટ્રીય સચિવ કૃષ્ણ હરિ, બિહારના આઈવાયસી રાજ્ય સચિવ કુંદન યાદવ, ઉત્તર પ્રદેશના આઈવાયસી રાજ્ય પ્રમુખ અજય કુમાર અને તેલંગાણાના નરસિંહ યાદવનો સમાવેશ થાય છે. દિલ્હી પોલીસે આરોપ લગાવ્યો છે કે પ્રદર્શનકારીઓએ સ્થળ પર રાષ્ટ્ર વિરોધી સૂત્રોચ્ચાર કર્યા હતા અને વડા પ્રધાન નરેન્દ્ર મોદીની વાંધાજનક છબીઓવાળી ટી-શર્ટ પહેરી હતી. પોલીસે કોર્ટને જણાવ્યું હતું કે તેમને આરોપીઓના મોબાઇલ ફોન જપ્ત કરીને તેમની પૂછપરછ કરવાની જરૂર છે. પ્રદર્શનકારીઓ અલગ અલગ રાજ્યોના હોવાથી, કસ્ટડીમાં પૂછપરછ જરૂરી છે.
પોલીસના જણાવ્યા અનુસાર, વિરોધ પ્રદર્શનને રોકવાના પ્રયાસ દરમિયાન ત્રણ લોકો ઘાયલ થયા હતા. પોલીસે એમ પણ જણાવ્યું હતું કે વિરોધ પ્રદર્શન પાછળના કોઈપણ કાવતરા, ભંડોળના સ્ત્રોત અને ટી-શર્ટ ક્યાં છાપવામાં આવ્યા હતા તેની તપાસ કરવી મહત્વપૂર્ણ છે. દરમિયાન, પ્રદર્શનકારીઓનું પ્રતિનિધિત્વ કરતા
વકીલે દલીલ કરી હતી કે તેઓ એક રાજકીય પક્ષ સાથે જોડાયેલા છે અને શાંતિપૂર્ણ રીતે તેમના લોકશાહી અધિકારોનો ઉપયોગ કરી રહ્યા છે. વકીલે જણાવ્યું હતું કે ફક્ત વિરોધ કરવા બદલ તેમની ધરપકડ કરવી લોકશાહીની ભાવનાની વિરુદ્ધ છે. પોલીસે તેમની સામે જાહેર સેવકને તેમની સત્તાવાર ફરજ બજાવવામાં અવરોધ, જાહેર સેવક પર હુમલો, દ્વેષપૂર્ણ ભાષણ અને ગુનાહિત કાવતરાના આરોપસર કેસ દાખલ કર્યા છે.
