ન્યુઝીલેન્ડના શકિતશાળી ઓપનિંગ બેટ્સમેન ફિન એલને ટી ૨૦ વર્લ્ડ કપ ૨૦૨૬ ની ૧૧મી મેચમાં શાનદાર પ્રદર્શન કરીને ક્રિકેટ જગતમાં હલચલ મચાવી દીધી. ચેન્નાઈના એમએ ચિદમ્બરમ સ્ટેડિયમમાં રમાયેલી યુએઈ સામેની મેચમાં ફિન એલને રેકોર્ડની શ્રેણી તોડી હતી. આ મેચ દરમિયાન, ફિન એલને, ટિમ સીફર્ટ સાથે મળીને, પ્રથમ વિકેટ માટે ૧૭૫ રનની ધમાકેદાર ભાગીદારી કરી. આ ભાગીદારી ટી ૨૦ વર્લ્ડ કપના ઇતિહાસમાં કોઈપણ વિકેટ માટે સૌથી મોટી ભાગીદારી છે.
બંને બેટ્સમેનોએ યુએઈના બોલરોને કોઈ તક આપી નહીં અને સતત મોટા શોટ ફટકારીને રેકોર્ડ બુકમાં એક નવો અધ્યાય ઉમેર્યો. અગાઉ, ટી૨૦ વર્લ્ડ કપમાં સૌથી વધુ ભાગીદારીનો રેકોર્ડ ઇંગ્લેન્ડના જાસ બટલર અને એલેક્સ હેલ્સના નામે હતો, જેમણે ૨૦૨૨ ની સેમિફાઇનલમાં ભારત સામે ૧૭૦ રન ઉમેર્યા હતા. હવે, ફિન એલન અને સીફર્ટે ઇંગ્લેન્ડ માટે આ પ્રભાવશાળી રેકોર્ડને પાછળ છોડી દીધો છે. આ ઐતિહાસિક ભાગીદારીમાં, ફિન એલને ૮૪ રનની શાનદાર ઇનિંગ રમી. તેણે ૫૦ બોલમાં આ રન બનાવ્યા, જેમાં પાંચ ચોગ્ગા અને પાંચ જારદાર છગ્ગાનો સમાવેશ થાય છે. એલનની ઇનિંગ માત્ર મેચ વિજેતા જ નહીં પણ રેકોર્ડબ્રેકર પણ હતી.
ફિન એલને આ ઇનિંગ દરમિયાન એક મહત્વપૂર્ણ સીમાચિહ્ન હાંસલ કર્યું. તે હવે સૌથી ઓછા બોલમાં ટી૨૦ ક્રિકેટમાં ૫,૦૦૦ રન બનાવનાર બેટ્સમેન બની ગયો છે. એલને માત્ર ૨,૮૫૪ બોલમાં આ સીમાચિહ્ન હાંસલ કર્યો. આ સાથે યુવા ભારતીય ઓપનર અભિષેક શર્માનો વર્લ્ડ રેકોર્ડ તોડી નાખ્યો, જે તેણે ગયા મહિને જ બનાવ્યો હતો. અભિષેકે ૨૧ જાન્યુઆરીએ નાગપુરમાં ન્યૂઝીલેન્ડ સામેની પ્રથમ ટી૨૦ મેચ દરમિયાન ટી૨૦ ક્રિકેટમાં ૫,૦૦૦ રન પૂરા કર્યા હતા. ભારતીય ઓપનરે ૨,૮૯૮ બોલમાં આ સીમાચિહ્ન હાંસલ કર્યો હતો.
ટી૨૦ ક્રિકેટમાં સૌથી ઓછા બોલનો સામનો કરીને ૫૦૦૦ રન બનાવનારા બેટ્સમેનઃ
ફિન એલન – ૨૮૫૪
અભિષેક શર્મા – ૨૮૯૮
આન્દ્રે રસેલ – ૨૯૪૨
ટિમ ડેવિડ – ૩૧૨૭
વિલ જેક્સ – ૩૧૯૬
ગ્લેન મેક્સવેલ – ૩૨૩૯
આટલું જ નહીં, ફિન એલને છગ્ગા ફટકારવાના મામલે પણ ઇતિહાસ રચ્યો. તેણે માત્ર ૮૭૧ બોલમાં ૧૦૦ છગ્ગા ફટકાર્યા, જે ટી૨૦ ક્રિકેટમાં ૧૦૦ છગ્ગા ફટકારનાર ત્રીજા સૌથી ઝડપી બેટ્સમેન બન્યા. આ ખાસ યાદીમાં ફિન એલનથી આગળ ફક્ત વેસ્ટ ઇન્ડઝના એવિન લુઈસ અને આૅસ્ટ્રયાના કરણબીર સિંહ છે. એવિન લુઈસે ૭૮૯ બોલમાં ૧૦૦ છગ્ગા ફટકાર્યા હતા, જ્યારે કરણબીર સિંહે ૮૧૩ બોલમાં આ સિદ્ધિ મેળવી હતી.
