નેશનલ હેરાલ્ડ સંબંધિત મની લોન્ડરિંગ કેસની સુનાવણી બુધવારે દિલ્હીની રાઉઝ એવન્યુ કોર્ટમાં થઈ હતી. આ દરમિયાન ઈડી વતી એએસજી એસવી રાજુએ દલીલો રજૂ કરી હતી. એએસજી એસવી રાજુએ જણાવ્યું હતું કે યંગ ઇન્ડિયનએ એસોસિએટેડ જર્નલ્સ લિમિટેડ (એજેએલ) ને હસ્તગત કરી હતી, જેની સંપત્તિ ૨૦૦૦ કરોડ રૂપિયા છે. યંગ ઇન્ડિયન પ્રાઇવેટ લિમિટેડની રચના એજેએલને હસ્તગત કરવા માટે કરવામાં આવી હતી.
એસવી રાજુએ જણાવ્યું હતું કે એજેએલના ડિરેક્ટરે કોંગ્રેસને પત્ર લખીને જણાવ્યું હતું કે પ્રકાશન બંધ થવાને કારણે અને નિયમિત આવકના અભાવે તેઓ લોન ચૂકવી શકતા નથી. એડિશનલ સોલિસિટર જનરલ રાજુએ દલીલ કરી હતી કે યંગ ઇન્ડિયનએ જાહેર કર્યું હતું કે સોનિયા ગાંધી અને રાહુલ ગાંધી તેના લાભાર્થી માલિકો છે. સોનિયા ગાંધી, રાહુલ ગાંધી, સુમન દુબે, સેમ પિત્રોડા યંગ ઇન્ડિયનમાં મુખ્ય હોદ્દા પર હતા.
એસવી રાજુએ કહ્યું કે ૨૦૦૦ કરોડ રૂપિયાની સંપત્તિ ધરાવતી કંપની એજેએલને ૯૦ કરોડ રૂપિયાની લોન માટે હસ્તગત કરવામાં આવી હતી. આ એક છેતરપિંડી છે. આ વાસ્તવિક વ્યવહાર નહોતો. છત્નન્ કોંગ્રેસ દ્વારા નહીં, પરંતુ યંગ ઇન્ડિયન દ્વારા હસ્તગત કરવામાં આવ્યું હતું. તેમણે કહ્યું કે તે એક કાવતરું હતું. કોંગ્રેસે વ્યાજ લીધું ન હતું, કે તેણે જામીન લીધા ન હતા.એએસજીએ કહ્યું કે ૯૦ કરોડ રૂપિયાની લોન ૫૦ લાખ રૂપિયામાં વેચાઈ હતી.
હકીકતમાં, આ સમગ્ર કેસમાં, સોનિયા ગાંધી, રાહુલ ગાંધી, સુમન દુબે, સેમ પિત્રોડા વિરુદ્ધ મની લોન્ડરિંગ સહિત અનેક કલમો હેઠળ ચાર્જશીટ દાખલ કરવામાં આવી છે. ઈડ્ઢ એ તેમની સામે મની લોન્ડરિંગ સહિત અનેક કલમો લગાવી છે. જોકે, કોંગ્રેસનું કહેવું છે કે યંગ ઇન્ડિયન એક બિન-લાભકારી કંપની છે અને તેનો કોઈ વ્યક્તિગત લાભ લેવામાં આવ્યો નથી. આ કેસની સુનાવણી ૮ જુલાઈ સુધી દરરોજ થશે, જ્યાં ઈડી અને આરોપીઓ તરફથી વધુ દલીલો સાંભળવામાં આવશે.
