દક્ષિણ પશ્ચિમ ચોમાસુ મહારાષ્ટ્ર પહોંચ્યા પછી, રાજ્યમાં વાવાઝોડા અને ભારે પવન સાથે ભારે વરસાદ પડી રહ્યો છે. રાજ્યના વિવિધ વિસ્તારોમાં વરસાદને કારણે પરિસ્થિતિ ગંભીર છે. મુંબઈ શહેરના ઘણા ભાગોમાં ભારે વરસાદ પડી રહ્યો છે. વરસાદ બાદ ઘણા વિસ્તારોમાં પાણી ભરાઈ ગયા છે. સવારથી જ તોફાન અને ભારે પવનને કારણે પરિસ્થિતિ ગંભીર બની રહી છે. ધૂળના તોફાનને કારણે દૃશ્યતા ઓછી હતી, જેના કારણે રેલ અને માર્ગ ટ્રાફિક પર અસર પડી હતી.
અધિકારીઓએ જણાવ્યું હતું કે, થોડા કલાકો સુધી સતત વરસાદને કારણે, મુંબઈમાં ઘણા નીચાણવાળા વિસ્તારો અને રેલ્વે ટ્રેક પાણીથી ભરાઈ ગયા હતા. સોમવારે સવારે રસ્તાઓ પર ટ્રાફિક અને લોકલ ટ્રેન સેવાઓને આનાથી અસર થઈ. ભારતીય હવામાન વિભાગ દ્વારા જારી કરાયેલ વાવાઝોડા અને ભારે પવનની ચેતવણી વચ્ચે મુંબઈના ઘણા વિસ્તારોમાં, ખાસ કરીને ટાપુ શહેરમાં થોડા કલાકો સુધી ભારે વરસાદ પડ્યો. ભારે વરસાદને કારણે મધ્ય રેલ્વે નેટવર્ક પર મસ્જિદ, ભાયખલા, દાદર, માટુંગા અને બદલાપુર રેલ્વે સ્ટેશનો પર પાટા પાણીમાં ડૂબી ગયા. આના કારણે સવારના ભારે ટ્રાફિક દરમિયાન ટ્રેનની ગતિ ધીમી પડી ગઈ. કિંગ્સ સર્કલ, મંત્રાલય, દાદર ટીટી પૂર્વ, પરેલ ટીટી, કાલાચોકી, ચિંચપોકલી અને દાદર સ્ટેશન સહિતના નીચાણવાળા વિસ્તારોમાં પાણી ભરાઈ ગયા હતા. જેના કારણે વાહનોની અવરજવર પર અસર પડી હતી.આગામી ત્રણથી ચાર કલાક દરમિયાન મુંબઈમાં અલગ અલગ સ્થળોએ વાવાઝોડા અને વીજળી પડવાની શક્યતા છે, સાથે જ ૫૦-૬૦ કિમી પ્રતિ કલાકની ઝડપે પવન ફૂંકાશે.
બૃહન્મુંબઈ મ્યુનિસિપલ કોર્પોરેશનના જણાવ્યા અનુસાર, શહેર અને ઉપનગરોમાં ક્યાંય પણ મોટા પાણી ભરાવાના અહેવાલ નથી. જાકે, શહેરના કેટલાક નીચાણવાળા વિસ્તારોમાં પાણી ભરાઈ ગયા હતા. મધ્ય અને પશ્ચિમ રેલ્વેની ઉપનગરીય સેવાઓ મોડી ચાલી રહી હતી અને ઓછી દૃશ્યતાને કારણે માર્ગ ટ્રાફિક ધીમો હતો.
હવામાન વિભાગે મુંબઈ અને આસપાસના વિસ્તારો માટે યલો એલર્ટ જારી કર્યું છે, જેનો અર્થ એ છે કે મધ્યમથી ભારે વરસાદની શક્યતા છે, જે સામાન્ય જનજીવનને અસર કરી શકે છે. મુંબઈ, થાણે અને પાલઘર જેવા દરિયાકાંઠાના જિલ્લાઓ માટે ચેતવણી જારી કરવામાં આવી છે, જ્યાં દરિયાઈ પવન અને વીજળી પડવાની ઘટનાઓ થવાની સંભાવના છે, જેના માટે સ્થાનિક વહીવટીતંત્રે નાગરિકોને વધુ સાવધાની રાખવાની અપીલ કરી છે. મુંબઈની લાઈફલાઈન ગણાતી લોકલ ટ્રેનો, ખાસ કરીને કુર્લા, ભાંડુપ અને વિક્રોલી જેવા વિસ્તારોમાં ૧૫ થી ૨૦ મિનિટ મોડી પડી રહી છે.છત્રપતિ શિવાજી મહારાજ આંતરરાષ્ટ્રીય વિમાનમથક પર ખરાબ હવામાનને કારણે ઘણી ફ્લાઇટ્સ મોડી પડી શકે છે અથવા ડાયવર્ટ થઈ શકે છે, જેના કારણે મુસાફરોને અસુવિધા થઈ શકે છે.
હવામાન વિભાગે આગાહી કરી છે કે આગામી થોડા દિવસો સુધી મુંબઈ અને મહારાષ્ટ્રના ઘણા ભાગોમાં ભારે વરસાદ ચાલુ રહેશે, જેની જનજીવન પર વધુ અસર પડી શકે છે. નાગરિકોને સતર્ક રહેવા, સ્થાનિક અધિકારીઓની જાહેરાતોનું પાલન કરવા અને જરૂરી સાવચેતી રાખવા વિનંતી છે.
