ભારતીય રિઝર્વ બેંકે આજે સતત ત્રીજી વખત રેપો રેટમાં ઘટાડો કર્યો છે. આ વખતે આરબીઆઇએ રેપો રેટમાં ૫૦ બેસિસ પોઈન્ટ એટલે કે ૦.૫૦ ટકાનો સીધો ઘટાડો કર્યો છે. રિઝર્વ બેંકના ગવર્નર સંજય મલ્હોત્રાએ શુક્રવારે રેપો રેટમાં ૦.૫૦ ટકાનો ઘટાડો જાહેર કર્યો હતો. આજના તાજેતરના નિર્ણય પછી, રેપો રેટ હવે ૬.૦૦ ટકાથી ઘટીને ૫.૫૦ ટકા થઈ ગયો છે.
આજે ૪ જૂન, બુધવારથી શરૂ થયેલી રિઝર્વ બેંકની મોનેટરી પોલિસી કમિટી ની બેઠકનો છેલ્લો દિવસ હતો. રિઝર્વ બેંક ઓફ ઈન્ડિયાના ગવર્નર સંજય મલ્હોત્રાના નેતૃત્વમાં યોજાયેલી આ મહત્વપૂર્ણ બેઠકમાં રેપો રેટ ઘટાડવાનો નિર્ણય લેવામાં આવ્યો હતો. તમને જણાવી દઈએ કે ઘણા નિષ્ણાતોએ રેપો રેટમાં ૦.૨૫ ટકાના ઘટાડાની આગાહી કરી હતી.આરબીઆઇએ આ વર્ષે સતત ૩ વખત રેપો રેટમાં ઘટાડો કર્યો છે. અગાઉ ૭ ફેબ્રુઆરીએ આરબીઆઇએ રેપો રેટમાં ૦.૨૫ ટકાનો ઘટાડો કર્યો હતો અને તેને ૬.૫૦ ટકાથી ઘટાડીને ૬.૨૫ ટકા કર્યો હતો. આ પછી, રિઝર્વ બેંકે પણ ૯ એપ્રિલે રેપો રેટમાં ૦.૨૫ ટકાનો ઘટાડો કર્યો, જેનાથી રેપો રેટ ૬.૨૫ ટકાથી ઘટીને ૬.૦૦ ટકા થયો.
તમને જણાવી દઈએ કે ફેબ્રુઆરી ૨૦૨૫માં, લગભગ ૫ વર્ષના લાંબા અંતરાલમાં પ્રથમ વખત રેપો રેટમાં ઘટાડો કરવામાં આવ્યો હતો. ફેબ્રુઆરી ૨૦૨૫ પહેલા, એ મે ૨૦૨૦ માં રેપો રેટમાં ઘટાડો કર્યો હતો. ત્યારબાદ કોવિડ દરમિયાન દેશની અર્થવ્યવસ્થાને વેગ આપવા માટે ભારતીય રિઝર્વ બેંકે રેપો રેટમાં ૦.૪૦ ટકા (૪૦ બેસિસ પોઈન્ટ)નો ઘટાડો કર્યો હતો.આરબીઆઇએ જૂન ૨૦૨૩માં રેપો રેટ વધારીને ૬.૫ ટકા કર્યો હતો. જૂન ૨૦૨૩ પછી, ફેબ્રુઆરી ૨૦૨૫માં પહેલીવાર રેપો રેટમાં કોઈ ફેરફાર થયો હતો.
આરબીઆઇના આ નિર્ણયથી દેશના કરોડો સામાન્ય લોકોને મોટી રાહત મળશે. રેપો રેટ ઘટાડવાથી, હવે તેમને હોમ લોન, કાર લોન, પર્સનલ લોન તુલનાત્મક રીતે સસ્તા વ્યાજ દરે મળશે. લોન સસ્તી થવાને કારણે, લોકોની ઇએમઆઇ પણ ઘટશે અને તેઓ હવે વધુ બચત કરી શકશે. એટલું જ નહીં,ઇએમઆઇમાં બચતથી સામાન્ય લોકો તેમની અન્ય જરૂરિયાતો પૂરી કરી શકશે અથવા અન્ય વસ્તુઓ પર વધુ ખર્ચ કરી શકશે. તમને જણાવી દઈએ કે માંગ અને વપરાશ વધવાને કારણે દેશની અર્થવ્યવસ્થા મજબૂત બને છે.
