રાજુલા તાલુકામાં માળખાકીય સુવિધાઓને મજબૂત કરતા ધારાસભ્ય હીરાલાલ સોલંકીએ નિંગાળા ગામે દેવકા–નિંગાળા રોડ અને જોલાપર એપ્રોચ રોડનું વિધિવત ખાતમુહૂર્ત કર્યું હતું. આ પ્રસંગે સ્થાનિક આગેવાનો અને ગ્રામજનો મોટી સંખ્યામાં ઉપસ્થિત રહ્યા હતા. આ બંને નવા રસ્તાઓના નિર્માણથી ગ્રામ્ય કનેક્ટિવિટી વધશે તેમજ સ્થાનિકો માટે ખેતી, વેપાર અને શિક્ષણ અર્થે અવરજવર વધુ સુગમ બનશે. વિકાસની આ ગતિને આગળ વધારતા, ધારાસભ્યએ તાજેતરમાં રાજુલા શહેરમાં ‘નલ સે જલ’ યોજના અંતર્ગત ૮૫ લાખ લીટરની ક્ષમતા ધરાવતા પાણીના સમ્પનું પણ ભૂમિપૂજન કર્યું હતું. હાલમાં શહેરમાં કુલ ચાર સમ્પનું નિર્માણ કાર્ય ચાલી રહ્યું છે, જેનાથી ભવિષ્યમાં પીવાના પાણીની તંગી નિવારી શકાશે. ધારાસભ્ય સોલંકીએ રાજ્ય સરકારના સહયોગથી રાજુલાના શહેરી અને ગ્રામ્ય વિસ્તારોમાં થઈ રહેલા સતત વિકાસ બદલ સંતોષ વ્યક્ત કર્યો હતો.
