યુએસ પ્રમુખ ડોનાલ્ડ ટ્રમ્પે પુતિનને ધમકી આપી છે કે જા ૫૦ દિવસમાં યુક્રેનમાં યુદ્ધ સમાપ્ત કરવા માટે કોઈ કરાર નહીં થાય, તો રશિયા પર ૧૦૦ ટકા ટેરિફ લાદવામાં આવશે. યુએસ રાષ્ટ્રપતિએ નાટો સાથી દેશો સાથે યુક્રેનને વધુ શસ્ત્રો મોકલવા માટે કરારની પણ જાહેરાત કરી છે. સોમવારે નાટો સેક્રેટરી જનરલ માર્ક રુટ સાથે ઓવલ ઓફિસમાં મળેલી બેઠક દરમિયાન, યુએસ રાષ્ટ્રપતિએ કહ્યું કે તેઓ રશિયા-યુક્રેન યુદ્ધને સમાપ્ત કરવા માટેના કરાર તરફ પ્રગતિ ન કરવા બદલ રશિયાથી નાખુશ છે.
ભારત અને પાકિસ્તાન, રવાન્ડા અને ડેમોક્રેટિક રિપબ્લિક ઓફ કોંગો વચ્ચેના સંઘર્ષનો ઉલ્લેખ કરતા, ટ્રમ્પે દાવો કર્યો, “અમે વેપાર દ્વારા યુદ્ધો ઉકેલવામાં ખૂબ જ સફળ રહ્યા છીએ.”વ્હાઇટ હાઉસ ખાતે મળેલી બેઠક દરમિયાન, ટ્રમ્પે યુક્રેનને શસ્ત્રો મોકલવાની યોજનાની પણ પુષ્ટિ કરી, જેમાં પેટ્રિઅટ મિસાઇલ સિસ્ટમનો સમાવેશ થાય છે. રાષ્ટ્રપતિએ કહ્યું કે નાટો સાથીઓ અમેરિકા પાસેથી અબજા ડોલરના લશ્કરી સાધનો ખરીદશે અને યુક્રેનને પહોંચાડવામાં આવશે. ટ્રમ્પે કહ્યું, “મેં જર્મની અને મોટાભાગના મુખ્ય નાટો દેશો સાથે વાત કરી છે અને તેઓ તેના વિશે ખૂબ જ ઉત્સાહિત છે.”
નાટો સેક્રેટરી જનરલ માર્ક રુટએ કહ્યું કે આ યુક્રેનને શસ્ત્રોનો “માત્ર પ્રથમ શિપમેન્ટ” હશે, અને ભવિષ્યમાં વધુ શસ્ત્રો મોકલવામાં આવશે. તમને જણાવી દઈએ કે રશિયન હવાઈ હુમલાઓ સામે યુક્રેનની સુરક્ષા માટે પેટ્રિઅટ ઇન્ટરસેપ્ટર મિસાઇલો ખૂબ જ મહત્વપૂર્ણ છે. આ યુએસ-નિર્મિત હથિયાર યુક્રેનના શસ્ત્રાગારમાં એકમાત્ર મિસાઇલ છે જે રશિયન બેલિસ્ટિક મિસાઇલોને તોડી પાડવા સક્ષમ છે. રૂટે ભારપૂર્વક જણાવ્યું હતું કે યુક્રેન સાથેના શસ્ત્ર કરારમાં અમેરિકાના પોતાના ભંડારને પણ ધ્યાનમાં લેવામાં આવશે.
