મહારાસ્ટ્રના શાળા શિક્ષણ મંત્રી દાદાજી ભૂસેએ વિધાનસભામાં માહિતી આપી હતી કે મહારાસ્ટ્રના તમામ માધ્યમો અને તમામ મેનેજમેન્ટ બોર્ડની શાળાઓમાં મરાઠી ભાષાને ફરજિયાત વિષય બનાવવાની સૂચના લાગુ કરવામાં આવી છે. તેમણે વધુમાં જણાવ્યું હતું કે આ નિયમનું ઉલ્લંઘન કરનાર શાળાઓ સામે કડક કાર્યવાહી કરવામાં આવશે. તેઓ આ મુદ્દા પર સભ્ય હારૂન ખાન દ્વારા ઉઠાવવામાં આવેલા પ્રશ્નનો જવાબ આપી રહ્યા હતા.
મંત્રી દાદાજી ભૂસેએ જણાવ્યું હતું કે, ૧ માર્ચ, ૨૦૨૦ ના રોજના જાહેરનામા મુજબ, શિક્ષણનું માધ્યમ કે મેનેજમેન્ટ બોર્ડ ગમે તે હોય, બધી શાળાઓમાં મરાઠી ફરજિયાત છે. તેમણે સ્પષ્ટતા કરી હતી કે આંતરરાષ્ટ્રીય કે રાષ્ટ્રીય અભ્યાસક્રમનું પાલન કરતી શાળાઓમાં પણ, મરાઠીને ‘બીજી ભાષા’ કે ‘ત્રીજી ભાષા’ તરીકે શીખવવું ફરજિયાત છે. કોઈપણ સંજાગોમાં મરાઠીને દૂર કરી શકાતી નથી.
ધારાસભ્ય હારૂન ખાનની ચોક્કસ ફરિયાદ બાદ, મંત્રીએ જાહેરાત કરી હતી કે શિક્ષણ વિભાગ તાત્કાલિક સંબંધિત શાળાનું નિરીક્ષણ કરશે. તેમણે વધુમાં જણાવ્યું હતું કે જા મરાઠી શીખવવામાં ન આવે, તો કાનૂની જરૂરિયાતોની મેનેજમેન્ટને જાણ કર્યા પછી જરૂરી કાર્યવાહી કરવામાં આવશે. આ નિયમ સરકારી, ખાનગી, બિન-સરકારી અને તમામ વિદેશી બોર્ડ શાળાઓને લાગુ પડે છે.
મંત્રીએ જણાવ્યું હતું કે મરાઠી રાજ્યની સત્તાવાર ભાષા હોવાથી, સરકાર નવી પેઢી તે શીખે તેની ખાતરી કરવામાં કોઈ સમાધાન કરશે નહીં. નિયમોનું પાલન ન કરતી સંસ્થાઓને પહેલા ચેતવણી આપવામાં આવશે, અને સતત ઉલ્લંઘન કરવાથી શાળાની માન્યતા રદ કરવામાં આવશે.
દરમિયાન, મંત્રી ભૂસેએ જાહેરાત કરી કે ખાનગી પૂર્વ-પ્રાથમિક શાળાઓમાં ફરજિયાત પોર્ટલ નોંધણી, નિયમન અને ગુણવત્તા ખાતરી માટે ત્રણ થી છ વર્ષના બાળકો માટે ગુણવત્તાયુક્ત અને સલામત પૂર્વ-પ્રાથમિક શિક્ષણ સુનિશ્ચિત કરવા માટે કાયદો બનાવવામાં આવી રહ્યો છે.
સભ્ય મનીષા ચૌધરીએ ખાનગી પૂર્વ-પ્રાથમિક શાળાઓ માટે ફરજિયાત પોર્ટલ નોંધણીનો મુદ્દો ઉઠાવ્યો હતો. રાજ્ય અને જિલ્લા વહીવટીતંત્ર અને વાલીઓ માટે કેન્દ્રિય ડેટાબેઝ પ્રદાન કરવાના ઉદ્દેશ્યથી ૨૪ એપ્રિલ, ૨૦૨૫ ના રોજ એક સરકારી પરિપત્ર દ્વારા ‘પ્રિ-સ્કૂલ નોંધણી પોર્ટલ’ પર નોંધણી ફરજિયાત બનાવવામાં આવી હતી. મંત્રીના જણાવ્યા મુજબ, શાળાઓએ સ્થાન, વર્ગખંડોની સંખ્યા, સંચાલન, વિદ્યાર્થીઓની સંખ્યા, માળખાગત સુવિધાઓ, રમતના મેદાનો, સ્વચ્છતા, પીવાનું પાણી, સીસીટીવી અને સ્ટાફ સંબંધિત વિગતો પ્રદાન કરવાની અપેક્ષા રાખવામાં આવે છે.
