કેરળ નિઃશંકપણે પંચાયતી રાજમાં આગળ છે અને આ સંદર્ભમાં ભૂતપૂર્વ વડા પ્રધાન રાજીવ ગાંધીની અપેક્ષાઓ અન્ય કોઈપણ રાજ્ય કરતાં વધુ પૂર્ણ કરી છે
આગામી વિધાનસભા ચૂંટણી પહેલા કેરળમાં રાજકીય તાપમાન વધી ગયું છે. ભૂતપૂર્વ કેન્દ્રીય મંત્રી મણિશંકર ઐયરે દાવો કર્યો હતો કે કેરળના મુખ્યમંત્રી પિનરાઈ વિજયને કોંગ્રેસ પાર્ટીમાં ભૂકંપ લાવી દીધો છે. ઐયરે જણાવ્યું હતું કે વિજયન ફરી એકવાર કેરળના મુખ્યમંત્રી બનશે. તેમણે કેરળમાં પંચાયતી રાજ વ્યવસ્થામાં સુધારા માટે કાયદામાં સુધારો કરવાની જરૂરિયાત પર પણ ભાર મૂક્યો અને પિનરાઈ વિજયનને આ માટે જવાબદાર વ્યકિત ગણાવ્યા.
હકીકતમાં, મણિશંકર ઐયર તિરુવનંતપુરમમાં “વિઝન ૨૦૩૧ઃ વિકાસ અને લોકશાહી” નામના આંતરરાષ્ટ્રીય સેમિનારને સંબોધિત કરી રહ્યા હતા, જેનું ઉદ્ઘાટન સીએમ વિજયન દ્વારા કરવામાં આવ્યું હતું. આ કાર્યક્રમ દરમિયાન, મણિશંકર ઐયરે સૂચવ્યું કે પંચાયતી રાજ પ્રણાલીમાં કેરળના ટોચના સ્થાનને કાયદેસર રીતે સુરક્ષિત કરવા માટે જરૂરી સુધારા કરવા જાઈએ અને આ માટે સૂચનો આપ્યા.
કાર્યક્રમને સંબોધતા, ભૂતપૂર્વ કેન્દ્રીય મંત્રીએ કહ્યું કે દેશમાં કોઈ પંચાયતી રાજ સમર્થક બાકી નથી. કેરળમાં આ સેમિનારમાં મારા પક્ષના સાથીદારોની ગેરહાજરી બદલ મને દુઃખ છે. મુખ્યમંત્રી વિજયન, હું તમારા પગે પડીશ અને તમને કોંગ્રેસ દ્વારા છોડી દેવામાં આવેલી જવાબદારી સંભાળવા વિનંતી કરું છું.
કોંગ્રેસની આગેવાની હેઠળની યુપીએ સરકાર દરમિયાન પંચાયતી રાજ મંત્રી તરીકે સેવા આપી ચૂકેલા ઐયરે ભારત માટે મહાત્મા ગાંધીના વિઝનને યાદ કર્યું. તેમણે કહ્યું કે રાષ્ટ્ર પિતાએ એક એવા દેશની કલ્પના કરી હતી જ્યાં ગરીબમાં ગરીબ લોકો પણ માલિકીની ભાવના અનુભવે છે અને માને છે કે રાષ્ટ્ર નિર્માણમાં તેમની અસરકારક ભૂમિકા છે. તેમણે વધુમાં કહ્યું કે તે વિડંબના લાગે છે કે તે લક્ષ્ય તરફ સૌથી પ્રશંસનીય પ્રગતિ કરતું રાજ્ય કેરળ છે, જે માર્ક્સવાદી-લેનિનવાદી પક્ષ દ્વારા શાસિત છે.
કોંગ્રેસ નેતાએ આગળ કહ્યું, “મને ખબર નથી કે આ પ્રશંસા છે કે અપમાન, પરંતુ આ પ્રસંગે મારા પક્ષના સાથીદારોની ગેરહાજરી બદલ મને ખૂબ જ દુઃખ છે, કારણ કે આ એક રાજ્ય કાર્યક્રમ અને રાષ્ટ્રીય પ્રસંગ છે.” તેમણે કહ્યું કે કેરળ નિઃશંકપણે પંચાયતી રાજમાં આગળ છે અને આ સંદર્ભમાં ભૂતપૂર્વ વડા પ્રધાન રાજીવ ગાંધીની અપેક્ષાઓ અન્ય કોઈપણ રાજ્ય કરતાં વધુ પૂર્ણ કરી છે. તેમણે કહ્યું, “જાકે કેરળ વ્યવહારમાં પંચાયતી રાજમાં પ્રથમ રાજ્ય છે, પરંતુ કાયદાની દ્રષ્ટિએ તે બીજા ક્રમે છે.”
કેરળના મુખ્યમંત્રીએ ટ્વિટર પર મણિશંકર ઐયરના નિવેદનનો વીડિયો શેર કર્યો, જેમાં તેમની પ્રશંસા કરી. તેમણે પોતાની પોસ્ટમાં લખ્યું, “વિઝન ૨૦૩૧ આંતરરાષ્ટÙીય પરિષદમાં બોલાયેલા પ્રેરણાદાયી શબ્દો સમકાલીન લેન્ડસ્કેપ સાથે સંપૂર્ણ રીતે સુસંગત છે. અમે આ માન્યતામાં એક છીએ કે લોકશાહી ત્યારે જ ખીલે છે જ્યારે સત્તા લોકોના હાથમાં હોય છે. અમે વિકાસની કરોડરજ્જુ ગણાતી આપણી સ્થાનિક સંસ્થાઓને મજબૂત બનાવવાનું ચાલુ રાખીશું.”
