મહારાષ્ટ્રના મુખ્યમંત્રી દેવેન્દ્ર ફડણવીસે ઉદ્ધવ ઠાકરેને તેમની સાથે જોડાવા માટે ખુલ્લી ઓફર આપી છે. વિધાન પરિષદમાં ભાષણ આપતી વખતે ફડણવીસે હસતાં હસતાં ઉદ્ધવ ઠાકરેને કહ્યું કે જો તમે અહીં આવવા માંગતા હો, તો વિચાર કરો. મુખ્યમંત્રી દેવેન્દ્ર ફડણવીસે મરાઠીમાં ભાષણમાં કહ્યું, જુઓ ઉદ્ધવ જી, ૨૦૨૯ સુધી, અમારા માટે ત્યાં (વિરોધ) આવવાનો કોઈ અવકાશ નથી. પરંતુ જો તમે અહીં આવવા માંગતા હો, તો વિચાર કરો. તે તમારા પર નિર્ભર છે.. અંબાદાસ દાનવે (ઉદ્ધવ જૂથના નેતા) ગમે ત્યાં (પક્ષ કે વિપક્ષ) હોઈ શકે છે પરંતુ તેમના વાસ્તવિક વિચારો હિન્દુત્વ છે.
ઉદ્ધવ ઠાકરે અને દેવેન્દ્ર ફડણવીસની મુલાકાત બાદ, ગૃહમાં મુખ્યમંત્રી દેવેન્દ્ર ફડણવીસનો આ સીધો પ્રસ્તાવ મહારાષ્ટ્રના રાજકારણમાં એક મોટું પગલું માનવામાં આવી રહ્યો છે. મુખ્યમંત્રી દેવેન્દ્ર ફડણવીસે વિરોધ પક્ષના નેતાના વિદાય સમારંભના ભાષણ દરમિયાન આ પ્રસ્તાવ મૂક્યો હતો. બૃહન્મુંબઈ મ્યુનિસિપલ કોર્પોરેશનની ચૂંટણીના થોડા મહિના પહેલા ભાજપ દ્વારા ઉદ્ધવ ઠાકરેને આ ઓફર કરવામાં આવી હતી. બીએમસી હજુ પણ શિવસેનાના ઉદ્ધવ ઠાકરે જૂથના કબજામાં હતું. છેલ્લી ચૂંટણીમાં, ભાજપ અને શિવસેનાની બેઠકો લગભગ સમાન હતી.
તાજેતરમાં, ઉદ્ધવ ઠાકરે, તેમના પિતરાઈ ભાઈ અને મહારાષ્ટ્ર નવનિર્માણ સેનાના વડા રાજ ઠાકરે સાથે, મહારાષ્ટ્રની શાળાઓમાં હિન્દી ભાષા ફરજિયાત બનાવવાના નિર્ણયનો સખત વિરોધ કર્યો હતો. બંને ભાઈઓ ૨૦ વર્ષના રાજકીય મતભેદોને ભૂલીને એક મંચ પર ભેગા થયા હતા. જોકે, શિવસેના પણ ઉત્તર ભારતીયો પ્રત્યે એમએનએસના તીવ્ર વિરોધથી સહજ નથી. બંને પક્ષો વચ્ચે રાજકીય જોડાણ થવાની શક્યતા પણ હવે મુશ્કેલીમાં મુકાઈ રહી હોય તેવું લાગે છે.
જોકે, રાજકીય નિષ્ણાતો કહે છે કે શિવસેના ઉદ્ધવ ઠાકરે જૂથ માટે શાસક ગઠબંધન સાથે આવવું સરળ નથી. તેમને શિવસેના શિંદે જૂથ સાથે લેવા એ ભાજપ માટે એક મોટો પડકાર હશે. નોંધનીય છે કે ૨૦૧૯ની મહારાષ્ટ્ર વિધાનસભા ચૂંટણી સુધી ભાજપ અને ઉદ્ધવ ઠાકરેની આગેવાની હેઠળની શિવસેના સાથે હતા. પરંતુ મુખ્યમંત્રી પદ માટે બંને પક્ષોના રસ્તા અલગ થઈ ગયા. ઉદ્ધવ ઠાકરેએ વિરોધ પક્ષ કોંગ્રેસ અને શરદ પવારની એનસીપી સાથે હાથ મિલાવ્યા.
મહા વિકાસ આઘાડી ગઠબંધન સરકાર અસ્તીત્વમાં આવી. જોકે, લગભગ અઢી વર્ષ પછી, શિવસેનામાં વિભાજન થતાં એકનાથ શિંદેના નેતૃત્વમાં એક અલગ પક્ષની રચના કરવામાં આવી. ભાજપે ગઠબંધનમાં તેમને મુખ્યમંત્રી પદ આપીને મોટો જુગાર રમ્યો. ૨૦૨૪ની મહારાષ્ટ્ર વિધાનસભા ચૂંટણીમાં, ભાજપ શિવસેના શિંદે જૂથ અને એનસીપીના અજિત પવાર જૂથ સાથે જંગી બહુમતી સાથે સરકાર બનાવીને સત્તામાં પાછી ફરી.
