બિહાર વિધાનસભા ચૂંટણી પહેલા,રાષ્ટ્રિય જનતા દળના નેતા અને ભૂતપૂર્વ નાયબ મુખ્યમંત્રી તેજસ્વી યાદવ એક નવા વિવાદમાં ફસાઈ ગયા છે. તેજસ્વી પર બે અલગ અલગ મતદાર ઓળખ કાર્ડ હોવાનો આરોપ છે. ચૂંટણી પંચે આ મામલાની તપાસ શરૂ કરવાનો નિર્ણય લીધો છે.
આ વિવાદ ત્યારે શરૂ થયો જ્યારે તેજસ્વીએ દાવો કર્યો કે તેમનું નામ સ્પેશિયલ ઇન્ટેન્સીવ રિવિઝન હેઠળ બહાર પાડવામાં આવેલી ડ્રાફ્ટ મતદાર યાદીમાં નથી. તેજસ્વીએ શનિવારે પટનામાં એક પત્રકાર પરિષદમાં કહ્યું કે તેમણે ચૂંટણી પંચની વેબસાઇટ પર તેમનો ઇપીઆઇસી નંબર (આરએબી ૨૯૧૬૧૨૦) શોધ્યો, પરંતુ ‘નો રેકોર્ડ મળ્યો’ નો સંદેશ આવ્યો. તેમણે તેને ‘લોકશાહી પર હુમલો’ ગણાવ્યો અને કમિશન પર સવાલ ઉઠાવ્યા. જાકે, ચૂંટણી પંચે તેમના દાવાને ફગાવી દીધો અને સ્પષ્ટતા કરી કે તેજસ્વીનું નામ મતદાન મથક નંબર ૨૦૪, સીરીયલ નંબર ૪૧૬ પર મતદાર યાદીમાં નોંધાયેલું છે. તેમનો માન્ય ઇપીઆઇસી નંબર આરએબી ૦૪૫૬૨૨૮ છે.
ચૂંટણી પંચના સૂત્રોએ જણાવ્યું હતું કે તેજસ્વીએ પ્રેસ કોન્ફરન્સમાં જે ઇપીઆઇસી નંબર આરએબી૨૯૧૬૧૨૦ બતાવ્યો હતો તે છેલ્લા ૧૦ વર્ષના રેકોર્ડમાં ક્યાય જોવા મળતો નથી. કમિશનને શંકા છે કે આ નંબર નકલી હોઈ શકે છે અથવા ગેરકાયદેસર રીતે બનાવવામાં આવ્યો હોઈ શકે છે. બીજી તરફ, ઇપીઆઇસી નંબર આરએબી ૦૪૫૬૨૨૮, જેના આધારે તેજસ્વીએ ૨૦૧૫ અને ૨૦૨૦ ની વિધાનસભા ચૂંટણી લડી હતી, તે સત્તાવાર રેકોર્ડમાં હાજર છે.
ચૂંટણી પંચે કહ્યું કે જા બીજા ઇપીઆઇસી નંબર નકલી હોવાનું જાણવા મળે છે, તો તે જનપ્રતિનિધિત્વ અધિનિયમ, ૧૯૫૧ હેઠળ ગંભીર ગુનો ગણાશે. ચૂંટણી પંચ આ મામલાની ઊંડાણપૂર્વક તપાસ કરી રહ્યું છે જેથી જાણી શકાય કે રાજદ કાર્યાલયમાંથી અન્ય નકલી મતદાર આઇડી બનાવવામાં આવ્યા છે કે નહીં.
બિહારના નાયબ મુખ્યમંત્રી સમ્રાટ ચૌધરી અને જેડીયુ પ્રવક્તા નીરજ કુમારે તેજસ્વી પર બે મતદાર ઓળખપત્ર હોવાનો આરોપ લગાવ્યો અને તેને ‘ચૂંટણી કૌભાંડ’ ગણાવ્યું. ચૌધરીએ કહ્યું, ‘પ્રેસ કોન્ફરન્સમાં તેજસ્વીએ જે સત્ય બતાવ્યું છે તે સ્પષ્ટપણે દર્શાવે છે કે તેમણે એક મોટું કૌભાંડ કર્યું છે. આની કડક તપાસ થવી જાઈએ.’ જેડીયુ નેતા નીરજ કુમારે આઈપીસીની કલમ ૧૭૧ એફ હેઠળ કેસ નોંધવાની અને તેજસ્વીના મતદાન અધિકારને અસ્થાયી રૂપે સસ્પેન્ડ કરવાની માંગ કરી છે.
