લાઠી-બાબરા પંથકના ધારાસભ્ય જનકભાઈ તળાવીયાના સઘન પ્રયાસોના ફળ સ્વરૂપે લાઠી તાલુકાના ગ્રામ્ય વિસ્તારમાં વિકાસકાર્યોને વેગ મળ્યો છે. કાંચરડી અને ઢસા જં. ગામને જોડતા અગત્યના માર્ગને રિસર્ફેસીંગ કરવા માટે રાજ્ય સરકાર દ્વારા રૂ. ૪.૫૦ કરોડનો માતબર ખર્ચ મંજૂર કરવામાં આવ્યો છે. કાંચરડી અને ઢસા જં. ગામ વચ્ચેનો આ રોડ આસપાસના અનેક ગામો માટે મુખ્ય પરિવહન માર્ગ તરીકે ઉપયોગી છે. જોકે, લાંબા સમયથી રોડ બિસ્માર હાલતમાં હોવાને કારણે ગ્રામજનોને અવરજવરમાં ભારે મુશ્કેલીનો સામનો કરવો પડતો હતો. આ સમસ્યા ધારાસભ્ય જનકભાઈ તળાવીયાના ધ્યાન પર આવતા તેમણે તાત્કાલિક ધોરણે રાજ્ય સરકારમાં રજૂઆત કરી હતી. આ રજૂઆતને પગલે માર્ગ અને મકાન વિભાગ દ્વારા રૂ. ૪.૫૦ કરોડની ગ્રાન્ટ ફાળવવામાં આવી છે. આ કામગીરીથી રોડની ગુણવત્તા સુધરશે અને વાહન વ્યવહાર સરળ બનશે. આ અંગે ધારાસભ્ય જનકભાઈ તળાવીયાએ જણાવ્યું હતું કે, “લાંબા સમયથી રોડની સ્થિતિ ચિંતાજનક હતી. રાજ્ય સરકારે મારી રજૂઆતને ધ્યાને લઈ તાત્કાલિક મોટી રકમ મંજૂર કરી છે, તે બદલ હું મુખ્યમંત્રી અને માર્ગ-મકાન મંત્રીનો આભાર વ્યક્ત કરું છું. આ કામ પૂર્ણ થવાથી ગ્રામ્ય વિસ્તારના લોકોનો સમય અને શ્રમ બચશે.”
