પશ્ચિમ બંગાળમાં ચાલી રહેલા એસઆઇઆર વિવાદ વચ્ચે, મુખ્ય ચૂંટણી કમિશનર જ્ઞાનેશ કુમારે એક નિવેદન બહાર પાડ્યું છે. ચૂંટણી પંચની આખી ટીમ બંગાળમાં હાજર છે. ચૂંટણી કમિશનર જ્ઞાનેશ કુમારે કહ્યું કે, કોઈપણ લાયક મતદારનું નામ મતદાર યાદીમાંથી દૂર કરવામાં આવશે નહીં. તેમણે ઉમેર્યું કે પશ્ચિમ બંગાળમાં મુક્ત, ન્યાયી અને શાંતિપૂર્ણ ચૂંટણી સુનિશ્ચિત કરવી એ ચૂંટણી પંચની પ્રાથમિકતા છે.
રાજકીય પક્ષો અને અધિકારીઓ સાથે અનેક બેઠકો બાદ કોલકાતામાં એક પત્રકાર પરિષદને સંબોધતા કુમારે કહ્યું કે પશ્ચિમ બંગાળના લોકો હંમેશા શાંતિપૂર્ણ અને સહભાગી લોકશાહીમાં વિશ્વાસ રાખે છે.
જ્ઞાનેશ કુમારે કહ્યું કે અમારું લક્ષ્ય બંગાળમાં મુક્ત અને ન્યાયી ચૂંટણીઓ અને શાંતિપૂર્ણ મતદાન સુનિશ્ચિત કરવાનું છે. મુખ્ય ચૂંટણી કમિશનરે એ પણ ભાર મૂક્્યો કે દરેક લાયક મતદારને પોતાનો મત આપવાની તક મળશે. તેમણે કહ્યું કે કોઈપણ લાયક મતદારનું નામ મતદાર યાદીમાંથી દૂર કરવામાં આવશે નહીં.
ચૂંટણી પંચ પશ્ચિમ બંગાળના તમામ મતદારોને અપીલ કરે છે કે આગામી ચૂંટણીઓ હિંસામુક્ત અને તણાવમુક્ત વાતાવરણમાં યોજવામાં આવે. લોકશાહીના આ ઉજવણીમાં પશ્ચિમ બંગાળના તમામ મતદારોએ મતદાન કરવું જાઈએ… પશ્ચિમ બંગાળમાં કુલ ૨૯૪ બેઠકો છે, જેમાંથી ૨૧૦ સામાન્ય શ્રેણી માટે, ૬૮ અનુસૂચિત જાતિ માટે અને ૧૬ અનુસૂચિત જનજાતિ માટે અનામત છે.
બંગાળમાં ચૂંટણી પ્રક્રિયાના વ્યાપક સ્વરૂપ પર પ્રકાશ પાડતા તેમણે કહ્યું કે પશ્ચિમ બંગાળમાં આશરે ૮૦,૦૦૦ મતદાન મથકો છે, જેમાંથી આશરે ૬૧,૦૦૦ ગ્રામીણ વિસ્તારોમાં સ્થિત છે. કુમારે એવી પણ જાહેરાત કરી કે ચૂંટણી પંચ મતદાન પ્રક્રિયા દરમિયાન પારદર્શિતા વધારવા માટે રાજ્યભરના મતદાન મથકો પર ૧૦૦% વેબકાસ્ટીગ લાગુ કરશે.
પશ્ચિમ બંગાળમાં મતદાર યાદીઓના એસઆઇઆર (વિશેષ મતદાર યાદી સુધારણા) બાદ, ચૂંટણી પંચે અંતિમ મતદાર યાદી જાહેર કરી છે. તેમાં જણાવાયું છે કે ડિસેમ્બર ૨૦૨૫ માં ડ્રાફ્ટ યાદી પ્રકાશિત થયા પછી ફોર્મ ૭ નો ઉપયોગ કરીને ૫૪૬,૦૫૩ મતદારોના નામ કાઢી નાખવામાં આવ્યા છે. એસઆઇઆર પ્રક્રિયા પહેલા પશ્ચિમ બંગાળમાં કુલ મતદારોની સંખ્યા ૭૬,૬૩૭,૫૨૯ (૭૬.૬ મિલિયન) હતી, જ્યારે હવે આ સંખ્યા ૭૦,૪૫૯,૨૮૪ (૭૦.૪ મિલિયન) છે. આના પરિણામે યાદીમાંથી ૬૧ લાખથી વધુ નામો બદલાયા છે. કમિશન અનુસાર, ૬,૦૦૬,૬૭૫ મતદારોના નામ હજુ પણ બાકી છે.
