મે મહિનામાં ઉત્તરાખંડમાં થયેલા હેલિકોપ્ટર અકસ્માતમાં છ લોકોના મોતના કેસમાં એરક્રાફ્ટ એકસીડેન્ટ ઇન્વેસ્ટિગેશન બ્યુરોએ તેનો પ્રાથમિક તપાસ રિપોર્ટ જાહેર કર્યો છે. રિપોર્ટ અનુસાર, હેલિકોપ્ટરનો મુખ્ય રોટર બ્લેડ ઉપરથી પસાર થતા ફાઇબર કેબલ સાથે અથડાયો અને પછી ટેકરી પરથી નીચે પડી ગયો અને એક ઝાડ સાથે અથડાયો. અકસ્માતનો પ્રાથમિક તપાસ અહેવાલ જાહેર કરતા,એએઆઇબીએ જણાવ્યું હતું કે તપાસ ટીમ અકસ્માતના મૂળ કારણો શોધવા માટે આગળની કાર્યવાહી પર કામ કરી રહી છે.
એરોટ્રન્સ સર્વિસીસ પ્રાઇવેટ લિમિટેડ દ્વારા સંચાલિત ૧૭ વર્ષ જૂનું બેલ ૪૦૭ હેલિકોપ્ટર, જેમાં છ મુસાફરો હતા, ૮ મેના રોજ ટેકઓફ થયાના ૨૪ મિનિટ પછી ક્રેશ થયું હતું. આ અકસ્માતમાં પાઇલટ અને પાંચ મુસાફરોનું મૃત્યુ થયું હતું, જ્યારે એક મુસાફર ગંભીર રીતે ઘાયલ થયો હતો.
એએઆઇબીએ જણાવ્યું હતું કે ૮ મેના રોજ સવારે ૮.૧૧ વાગ્યે ખારસાલી હેલિપેડથી ઉડાન ભર્યા પછી અકસ્માતમાં હેલિકોપ્ટર સંપૂર્ણપણે નાશ પામ્યું હતું, પરંતુ તેમાં આગ લાગી ન હતી. આ અકસ્માત સવારે ૮.૩૫ વાગ્યે ઉત્તરકાશીના ગંગણી ખાતે થયો હતો.
તેના પાંચ પાનાના અહેવાલમાં,એએઆઇબીએ જણાવ્યું હતું કે હેલિકોપ્ટર ૨૦ મિનિટ સુધી ઉડાન ભર્યા પછી તેની નિર્ધારિત ઊંચાઈથી નીચે ઉતરવાનું શરૂ કર્યું. “શરૂઆતમાં, પાયલોટે ઉત્તરકાશી-ગંગોત્રી રોડ પર ગંગણી નજીક લેન્ડિંગ કરવાનો પ્રયાસ કર્યો હતો. લેન્ડિંગ પ્રયાસ દરમિયાન, હેલિકોપ્ટરનો મુખ્ય રોટર બ્લેડ રસ્તાની સમાંતર ચાલતા ઓવરહેડ ફાઇબર કેબલ સાથે અથડાઈ ગયો,” અહેવાલમાં જણાવાયું છે.
“તેણે રસ્તાની બાજુમાં કેટલાક મેટલ બેરિકેડ્સને પણ નુકસાન પહોંચાડ્યું. જાકે, હેલિકોપ્ટર લેન્ડ કરવામાં અસમર્થ રહ્યું અને ટેકરી પરથી નીચે પડી ગયું. લગભગ ૨૫૦ ફૂટ ઊંડી ખાડીમાં એક ઝાડ સાથે અથડાયા પછી તે આખરે અટકી ગયું,” અહેવાલમાં વધુમાં જણાવાયું છે. હેલિકોપ્ટરનું ઉત્પાદન ૨૦૦૮ માં કરવામાં આવ્યું હતું
રોલ્સ રોયસ એન્જીનથી ચાલતું આ હેલિકોપ્ટર ૨૦૦૮ માં બનાવવામાં આવ્યું હતું. યુએસ નેશનલ ટ્રાન્સપોર્ટેશન સેફ્ટી બોર્ડ અને ટ્રાન્સપોર્ટેશન સેફ્ટી બોર્ડ ઓફ કેનેડાએ આ તપાસ માટે માન્યતા પ્રાપ્ત પ્રતિનિધિઓ અને ટેકનિકલ સલાહકારોની નિમણૂક કરી છે. અહેવાલમાં જણાવાયું છે કે, “મૂળ કારણ શોધવા માટે વધુ કાર્યવાહી માટે તપાસ ટીમ તેમની સાથે સંકલન કરી રહી છે.
