અમેરિકાના લોસ એન્જલસમાં ઇમિગ્રન્ટ નાગરિકો પર દરોડા સામે વિરોધ પ્રદર્શનો વધુ તીવ્ર બન્યા, કારણ કે કાયદા અમલીકરણ દ્વારા વિરોધીઓ પર ટીયર ગેસ અને રબર ગોળીઓ છોડવામાં આવી. રાષ્ટ્રપતિ ડોનાલ્ડ ટ્રમ્પ દ્વારા વિવાદાસ્પદ રીતે નેશનલ ગાર્ડ તૈનાત કર્યા પછી અશાંતિ શરૂ થઈ, જેનો રાજ્યના ગવર્નર અને શહેરના મેયરે વિરોધ કર્યો. શુક્રવારે ડાઉનટાઉન લોસ એન્જલસમાં વિરોધ પ્રદર્શનો શરૂ થયા, જે શનિવાર સુધીમાં પેરામાઉન્ટ અને કોમ્પટન જેવા લેટિનો-બહુમતીવાળા વિસ્તારોમાં ફેલાઈ ગયા. એપીએ અહેવાલ આપ્યો છે કે હજારો વિરોધીઓએ લોસ એન્જલસના ડાઉનટાઉનમાં ધસી જઈને મુખ્ય હાઇવે બંધ કરી દીધા હતા અને ઓટોમેટેડ વાહનોમાં આગ લગાવી હતી.
સેંકડો લોકો મેટ્રોપોલિટન ડિટેન્શન સેન્ટરની બહાર એકઠા થયા હતા, જ્યાં દરોડા દરમિયાન અટકાયતીઓને રાખવામાં આવ્યા હતા. વિરોધીઓએ લાંબી બંદૂકો અને હુલ્લડ ઢાલ સાથે તૈનાત નેશનલ ગાર્ડ સૈનિકો પર “શરમ કરો” અને “ઘરે જાઓ” ના નારા લગાવ્યા હતા.
યુએસ પ્રમુખ ડોનાલ્ડ ટ્રમ્પે રવિવારે લોસ એન્જલસમાં વિરોધીઓને ચેતવણી આપી હતી કે જા તેઓ પોલીસ અધિકારીઓ અથવા સૈનિકો પર થૂંકશે તો ગંભીર પરિણામો ભોગવવા પડશે. ઇમિગ્રન્ટ્સ પર દરોડાના વિરોધમાં નેશનલ ગાર્ડ સૈનિકોને શહેરમાં મોકલ્યાના કલાકો પછી તેમની ચેતવણી આવી. એર ફોર્સ વનમાં ચઢતા પહેલા ન્યુ જર્સીમાં પત્રકારો સાથે વાત કરતા, ટ્રમ્પે ઓછામાં ઓછા ૨,૦૦૦ નેશનલ ગાર્ડ સભ્યોને તૈનાત કરવાના તેમના નિર્ણયનો બચાવ કર્યો. યુએસ ઇમિગ્રેશન અને કસ્ટમ્સ એન્ફોર્સમેન્ટ દ્વારા દરોડા પાડવામાં આવ્યા પછી લોસ એન્જલસમાં વિરોધ પ્રદર્શન શરૂ થયા.
શુક્રવારે મોડી રાત્રે શરૂ થયેલા ઇમિગ્રન્ટ્સ સામે વ્યાપક દરોડા દ્વારા વિરોધ પ્રદર્શનો શરૂ થયા છે. ફેડરલ બિલ્ડિગની બહાર અને પેરામાઉન્ટ પર પણ ભીડ એકઠી થઈ હતી, જ્યાં હોમ ડેપો નજીક દરોડા ચાલુ હોવાનું કહેવાય છે. કેટલાક વિરોધીઓએ અધિકારીઓ પર વસ્તુઓ ફેંકી ત્યારે તણાવ વધ્યો, જેના કારણે લોસ એન્જલસ પોલીસ વિભાગે તેને ગેરકાયદેસર સભા જાહેર કરી. પોલીસે ટીયર ગેસ, ફ્લેશ-બેંગ ગ્રેનેડ અને ભીડ નિયંત્રણ હથિયારોથી જવાબ આપ્યો. વિરોધીઓએ પાછળથી ૧૦૧ ફ્રીવે અવરોધિત કર્યો.
શહેરમાં નિયમિતપણે શાંતિપૂર્ણ વિરોધ પ્રદર્શનોનું આયોજન કરનારા ઇમિગ્રન્ટ્સના હિમાયતીઓએ રવિવારે બપોરે વિરોધ પ્રદર્શનોને વધુ તીવ્ર બનાવ્યા. જાકે, લગભગ ૩૦૦ નેશનલ ગાર્ડસમેનના આગમનથી લોકોના ગુસ્સા અને ભયમાં વધારો થયો, જેના કારણે અધિકારીઓ સાથે અથડામણ થઈ. ગવર્નર ગેવિન ન્યુસોમે ટ્રમ્પને લખેલા પત્રમાં લોસ એન્જલસમાં નેશનલ ગાર્ડની તૈનાતીની નિંદા કરી, તેને “રાજ્ય સાર્વભૌમત્વનું ગંભીર ઉલ્લંઘન” ગણાવ્યું. તેમણે દલીલ કરી કે નેશનલ ગાર્ડની હાજરી તણાવ વધારી રહી છે અને ફેડરલ સરકાર પર તણાવ વધારવા માટે “અરાજકતા વાવવાનો” આરોપ મૂક્યો.
ડોનાલ્ડ ટ્રમ્પે પોતાના નિર્ણયનો બચાવ કરતા દાવો કર્યો કે નેશનલ ગાર્ડની જરૂર હતી કારણ કે ડેમોક્રેટિક નેતાઓ ઇમિગ્રેશન એજન્ટો સામેના વિરોધ પ્રદર્શનોને નિયંત્રિત કરવામાં નિષ્ફળ ગયા હતા. શનિવારે, તેમણે “બળવો અથવા બળવાની ધમકી” ના જવાબમાં ફેડરલ દળોની તૈનાતીને મંજૂરી આપતી કાનૂની જાગવાઈનો ઉલ્લેખ કર્યો.
