અમેરિકાએ નેપાળ માટે કામચલાઉ સંરક્ષિત દરજજો સમાપ્ત કર્યો છે. આનાથી અમેરિકામાં રહેતા નેપાળીઓની મુશ્કેલીઓ વધી ગઈ છે. ૭,૦૦૦ થી વધુ નેપાળી નાગરિકોને પાછા ફરવું પડી શકે છે. તમને જણાવી દઈએ કે અમેરિકાએ નેપાળને આપવામાં આવેલ ટેમ્પરરી પ્રોટેક્ટેડ સ્ટેટસ સમાપ્ત કરવાનો નિર્ણય લીધો છે.
૨૦૧૫ માં આવેલા વિનાશક ભૂકંપ પછી નેપાળને આ દરજ્જા આપવામાં આવ્યો હતો. યુએસ ગૃહ મંત્રાલય દ્વારા શનિવારે જારી કરાયેલા એક નોટિફિકેશન અનુસાર, આ દરજ્જા ૨૪ જૂન, ૨૦૨૫ ના રોજ સમાપ્ત થશે અને તે પછી તેને લંબાવવામાં આવશે નહીં. નેપાળને સૌપ્રથમ એક શક્તિશાળી ભૂકંપ દરમિયાન આ દરજજો આપવામાં આવ્યો હતો, જેના કારણે દેશને ભારે નુકસાન થયું હતું. આ નિર્ણય પાછળનું કારણ એ હતું કે કુદરતી આફતને કારણે સુરક્ષિત રીતે નેપાળ પાછા ફરવું શક્ય નહોતું.ટીપીએસ હેઠળ, અન્ય કોઈપણ કાનૂની દરજજો વિના અમેરિકામાં રહેતા લોકોને ૧૮ મહિના સુધી કાયદેસર રીતે રહેવા અને કામ કરવાની છૂટ છે.
હાલમાં, અમેરિકામાં લગભગ ૧૨,૭૦૦ નેપાળી નાગરિકો પાસે ટીપીએસ છે, જેમાંથી ૫,૫૦૦ થી વધુ અત્યાર સુધીમાં અમેરિકામાં કાયદેસર રીતે કાયમી રહેવાસી બની ગયા છે. જોકે ટીપીએસ સમાપ્ત થયા પછી, લગભગ ૭,૦૦૦ નેપાળી નાગરિકોને હવે સંભવિત રીતે અમેરિકા છોડીને નેપાળ પાછા ફરવું પડશે, સિવાય કે તેઓ કોઈ અન્ય કાનૂની માધ્યમ દ્વારા અમેરિકામાં રહેવાનો આધાર સ્થાપિત કરી શકે.
અહેવાલ મુજબ, યુએસ ગૃહ સચિવ ક્રિસ્ટી નોઈમે જણાવ્યું હતું કે ટીપીએસ સમાપ્ત થયા પછી, અસરગ્રસ્ત વ્યક્તિઓને ૫ ઓગસ્ટ સુધી ૬૦ દિવસનો વધારાનો સમયગાળો આપવામાં આવશે, જેથી તેઓ તેમના વિકલ્પોની સમીક્ષા કરી શકે અથવા પાછા ફરવાની તૈયારી કરી શકે. તેમણે સ્પષ્ટતા કરી કે આ નિર્ણય નેપાળમાં વર્તમાન પરિસ્થિતિઓના આધારે લેવામાં આવ્યો છે, જ્યાં જીવન હવે સામાન્ય થઈ ગયું છે અને ટીપીએસ ચાલુ રાખવાની મૂળભૂત જરૂરિયાત સમાપ્ત થઈ ગઈ છે.
કેટલાક સંગઠનો અને માનવાધિકાર જૂથો દ્વારા આ નિર્ણયને ચિંતાજનક ગણાવવામાં આવ્યો છે. તેઓ માને છે કે ભલે નેપાળ હવે કટોકટીમાંથી બહાર આવી ગયું હોય, સામાજિક, આર્થિક અને રાજકીય સ્થિરતા હજુ સુધી સંપૂર્ણપણે પુનઃસ્થાપિત થઈ નથી. યુએસમાં રહેતા ઘણા નેપાળી નાગરિકો વર્ષોથી યુએસ સામાજિક અને આર્થિક વ્યવસ્થાનો ભાગ બની ગયા છે, અને હવે તેમને અચાનક પાછા ફરવા માટે મજબૂર કરવાથી ગંભીર માનવતાવાદી કટોકટી ઊભી થઈ શકે છે.
