મહારાષ્ટ્ર વિધાનસભાની ચૂંટણીનો જંગ શરૂ થઈ ગયો છે. મહાયુતિ અને મહાવિકાસ આઘાડી વચ્ચે આરોપ-પ્રત્યારોપનો દોર ચાલુ છે. જે રીતે સીએમ ચહેરાને લઈને આઘાડીમાં મંથન ચાલી રહ્યું છે તે જ રીતે મહાયુતિમાં પણ આ મુદ્દે અલગ-અલગ નિવેદનો આવી રહ્યા છે. આ ક્રમમાં પુણેમાં પત્રકારો સાથે વાત કરતા અજિત પવારે આગામી સીએમને લઈને મોટું નિવેદન આપ્યું છે. જ્યારે તેમને પૂછવામાં આવ્યું કે મહાયુતિ તરફથી આગામી સીએમ કોણ હશે? શું તમે પણ સીએમનો ચહેરો બનવા માંગો છો? તો આ સવાલના જવાબમાં અજિત પવારે કહ્યું કે કોણ સીએમ નથી બનવા માંગતું!
આ દરમિયાન એનસીપી જૂથના વડા અજિતે પણ સીટ વહેંચણી અંગે મહત્વપૂર્ણ નિવેદન આપ્યું છે. તેમણે કહ્યું કે અમારી પાર્ટીએ મહાયુતિની સીટ વહેંચણીની જાણકારી આપી છે. તેમણે કહ્યું કે અમારા ગઠબંધનની પ્રથમ પ્રાથમિકતા મહારાષ્ટ્રમાં સરકાર બનાવવાની છે. આ મુદ્દે મહાયુતિના તમામ પક્ષો એકસાથે છે. સીટ નક્કી થતાં જ અમે તેની જાહેરાત કરીશું. પરંતુ ચર્ચા છે કે અજીત જૂથ ૮૦ થી ૯૦ બેઠકો માંગી શકે છે.
અજિત પવાર હાલ મહારાષ્ટ્રના ડેપ્યુટી સીએમ છે. તેણે પૂણેમાં દગડુસેઠ ગણપતિની પૂજા કરી હતી. આ દરમિયાન તેમણે રાજ્યમાં સ્થિરતા અને સમૃદ્ધિની કામના કરી હતી. પૂજા બાદ પત્રકારો સાથે વાત કરતા અજિત પવારે કહ્યું કે દરેક પાર્ટીના તમામ સભ્યો મુખ્યમંત્રી બનવા ઈચ્છે છે પરંતુ તેના માટે આંકડા પણ હોવા જાઈએ.
બીજી તરફ એનસીપી અજિત જૂથની મહિલા પ્રદેશ અધ્યક્ષ રૂપાલી ચકાંકરે અજિત પવારની તરફેણમાં અવાજ ઉઠાવ્યો છે. તેમણે કહ્યું કે અમારી પાર્ટીના કાર્યકરો ઈચ્છે છે કે અજિત પવાર મહારાષ્ટ્રના મુખ્યમંત્રી બને. તેણે કહ્યું કે તેણે ગણપતિ પાસે આ વરદાન માંગ્યું છે.
બીજી તરફ શિવસેના ઉદ્ધવ ઠાકરે જૂથના વરિષ્ઠ નેતા સંજય રાઉતે મહાયુતિ અને અજિત પવાર જૂથ પર નિશાન સાધ્યું છે. તેમણે દાવો કર્યો હતો કે મહાયુતિમાં સીટ વહેંચણીના મુદ્દે યુદ્ધ છેડાયું છે. તેમનો દાવો છે કે ભાજપ બંને પક્ષોને ઓછી બેઠકો આપવા માંગે છે. સંજય રાઉતે દાવો કર્યો છે કે ભાજપ અજિત અને શિંદે બંને જૂથને ૪૦-૪૦ બેઠકો આપવા માંગે છે.
સંજય રાઉતે એવો પણ દાવો કર્યો છે કે ૨૮૮ બેઠકોવાળી મહારાષ્ટÙ વિધાનસભામાં ભાજપ પોતે ૧૬૦ બેઠકો પર ચૂંટણી લડવાની તૈયારી કરી રહ્યું છે, જ્યારે અજીત જૂથ અને શિંદે જૂથ ૬૦ થી ૭૦ બેઠકોની માંગ કરી શકે છે.
