ચીનના શાંક્સી પ્રાંતમાં થયેલા વિનાશક કોલસા ખાણ અકસ્માત પર પ્રધાનમંત્રી નરેન્દ્ર મોદીએ ઊંડો શોક વ્યક્ત કર્યો. સોશિયલ મીડિયા પ્લેટફોર્મ એકસ પર એક પોસ્ટમાં, પ્રધાનમંત્રીએ ચીનના રાષ્ટ્રપતિ શી જિનપિંગ અને ત્યાંના લોકો પ્રત્યે સંવેદના વ્યક્ત કરી. પ્રધાનમંત્રી મોદીએ લખ્યું, “ચીનના શાંક્સી પ્રાંતમાં ખાણકામ દુર્ઘટનામાં થયેલા જાનહાનિથી દુઃખી છું. ભારતના લોકો વતી, રાષ્ટ્રપતિ શી જિનપિંગ અને ચીનના લોકો પ્રત્યે મારી સંવેદનાઓ છે.” તેમણે આ દુઃખદ સમયમાં પીડિતોના પરિવારોને શક્તિ મળે અને ગુમ થયેલા લોકો સુરક્ષિત અને ઝડપથી સ્વસ્થ થાય તે માટે પ્રાર્થના કરી.
આ અકસ્માત ચીનના શાંક્સી પ્રાંતમાં લિયુશેન્યુ કોલસા ખાણમાં થયેલા પ્રચંડ ગેસ વિસ્ફોટને કારણે થયો હતો. અત્યાર સુધીમાં ઓછામાં ઓછા ૯૦ લોકોના મોત થયા છે. અકસ્માત સમયે, ૨૪૭ કામદારો ખાણની અંદર કામ કરી રહ્યા હતા. એવી આશંકા છે કે કેટલાક લોકો હજુ પણ અંદર ફસાયેલા હોઈ શકે છે. ચીનની રાજ્ય સમાચાર એજન્સી, શિન્હુઆ અનુસાર, બેઇજિંગથી લગભગ ૫૨૦ કિલોમીટર દક્ષિણપશ્ચિમમાં કિન્યુઆન કાઉન્ટીમાં સ્થિત ખાણમાં વિસ્ફોટ થયો હતો. એવું અહેવાલ છે કે અકસ્માતના થોડા સમય પહેલા ખાણ પ્રણાલીમાં કાર્બન મોનોક્સાઇડ ગેસની ચેતવણી મળી હતી.
આ અકસ્માત બાદ, ચીની અધિકારીઓએ કડક કાર્યવાહી કરી છે અને ખાણ ચલાવતી કંપનીના અનેક અધિકારીઓની અટકાયત કરી છે. આ ઘટનાને છેલ્લા દાયકામાં ચીનમાં થયેલા સૌથી મોટા અને ભયંકર કોલસા ખાણ અકસ્માતોમાંની એક માનવામાં આવે છે. રાષ્ટ્રપતિ શી જિનપિંગે રાહત અને બચાવ ટીમોને બચી ગયેલા લોકોને શોધવા માટે દરેક શક્ય પ્રયાસો કરવા સૂચના આપી છે. તેમણે કહ્યું કે અકસ્માત માટે જવાબદાર લોકો સામે કડક કાર્યવાહી કરવી જાઈએ. શી જિનપિંગે એમ પણ કહ્યું હતું કે વરસાદની ઋતુને ધ્યાનમાં રાખીને ખાણ વિસ્તારમાં પૂર નિવારણના પગલાં લેવા જાઈએ.
તાજેતરમાં, ચીનના હુનાન પ્રાંતમાં ભારે વરસાદ અને પૂરમાં ઓછામાં ઓછા સાત લોકો માર્યા ગયા હતા, અને ૧૪ હજુ પણ ગુમ છે. ચીનના વડા પ્રધાન લી કેકિયાંગે પણ રાહત કામગીરીને ઝડપી બનાવવા અને અકસ્માતના કારણની ઝડપી તપાસના આદેશ આપ્યા છે. તેમણે કહ્યું કે જવાબદારોને જવાબદાર ઠેરવવામાં આવશે. સ્થાનિક મીડિયા અનુસાર, શુક્રવારે સાંજે ૭ઃ૩૦ વાગ્યાની આસપાસ થયેલા વિસ્ફોટ પછી મૃત્યુઆંક ઝડપથી વધ્યો. શરૂઆતમાં, આઠ મૃત્યુની પુષ્ટિ થઈ હતી, પરંતુ બાદમાં આ આંકડો અચાનક વધીને ૮૨ થી વધુ થઈ ગયો અને પછી ૯૦ પર પહોંચી ગયો.
શાંક્સી ચીનનો સૌથી મોટો કોલસા ઉત્પાદક પ્રાંત છે અને દેશના ઉર્જા પુરવઠામાં મહત્વપૂર્ણ ભૂમિકા ભજવે છે. આ પ્રાંતમાં આશરે ૩૪ મિલિયન લોકો રહે છે. ગયા વર્ષે, પ્રાંતે આશરે ૧.૩ અબજ ટન કોલસાનું ઉત્પાદન કર્યું હતું, જે ચીનના કુલ કોલસા ઉત્પાદનના લગભગ એક તૃતીયાંશ હિસ્સો હતો. શાંક્સી પ્રાંતમાં અગાઉ અનેક મોટા અકસ્માતો થયા છે. ગયા મહિને, લુલિયાંગ વિસ્તારમાં એક ખાણ અકસ્માતમાં ચાર કામદારોના મોત થયા હતા, જ્યારે માર્ચ ૨૦૨૪ માં, ઝોંગયાંગમાં કોલસા બંકર ધરાશાયી થવાથી સાત લોકોએ જીવ ગુમાવ્યા હતા.
