જાફરાબાદ ખાતે વર્ષોથી ચાલી આવતી પરંપરા મુજબ આજે ચૈત્ર માસના પાવન દિવસોમાં દરિયાદેવનું વિશેષ પૂજન કરવામાં આવ્યું હતું. સ્થાનિક બહેનો દ્વારા પરિવારના સભ્યોના રક્ષણ અને જીવનની રોજીરોટી માટે હૃદયપૂર્વક પ્રાર્થના કરવામાં આવી હતી. આ પવિત્ર પ્રસંગે આશરે ૪૦૦ થી ૫૦૦ જેટલી નાની નાની પ્રતિકૃતિ સમાન બોટો દરિયામાં અર્પણ કરવામાં આવી હતી. આ નાની બોટો મોટી બોટના માલિકો દ્વારા પંદરથી વીસ દિવસ પહેલાં જ ખૂબ જ કલાત્મક રીતે તૈયાર કરવામાં આવે છે. આ નાની બોટોની વિશેષતાઓ અદ્ભુત છે, કારણ કે તેમાં મોટી બોટ જેવી જ આબેહૂબ રચના, સમાન રંગ અને આકર્ષક ડિઝાઇન જોવા મળે છે. આ નાની બોટોમાં કેબિન, વીજળી, ગેસના બાટલા, વાયરલેસ સેટ, કોલ્ડરૂમ અને લાઈટિંગની સુવિધા પણ ઊભી કરાય છે. આ ઉપરાંત બોટના નામ, નંબર, ધજા અને ફિશિંગ નેટ સહિતની સંપૂર્ણ સજ્જતા પણ રાખવામાં આવે છે. દરેક બોટમાં ફૂલહાર, અગરબત્તી, નારિયેળ, નિવેદ અને પ્રસાદ ધરાવીને દરિયાદેવને અર્પણ કરવામાં આવે છે. આવી એક બોટની અંદાજિત કિંમત રૂ.૧૫૦૦ થી રૂ.૨૦૦૦ જેટલી થાય છે. આ સુંદર પરંપરા માત્ર શ્રધ્ધા જ નહીં, પરંતુ દરિયાકાંઠાના જીવન સાથે જોડાયેલો એક અનોખો અને ભવ્ય સાંસ્કૃતિક વારસો પણ છે.
