અમરેલી જિલ્લાના લાઠી તાલુકામાં આવેલું સુપ્રસિધ્ધ યાત્રાધામ ભુરખિયા હનુમાન મંદિર હજારો ભક્તોના આગમનથી જીવંત બન્યું હતું. દર વર્ષે પરંપરાગત રીતે યોજાતી આ ધાર્મિક યાત્રામાં આ વખતે પણ ભારે ઉત્સાહ જોવા મળ્યો હતો. મોડી રાતથી જ અમરેલી સહિત આસપાસના અનેક જિલ્લાઓમાંથી શ્રધ્ધાળુઓ પોતાની મનોકામનાઓ પૂર્ણ કરવાના ઉદ્દેશ્યથી પગપાળા ચાલીને દર્શનાર્થે પહોંચ્યા હતા. ભક્તોના હૃદયમાં રહેલી અતૂટ શ્રધ્ધાના કારણે લગભગ ૪૦ કિલોમીટર જેટલું લાંબું અંતર પણ સાવ સરળ બની ગયું હોય તેવું દ્રશ્ય સર્જાયું હતું. ભક્તોના સ્વાગત માટે આખા મંદિર પરિસરને રંગબેરંગી રોશની અને સુગંધિત તાજા ફૂલોથી કલાત્મક રીતે શણગારવામાં આવ્યું હતું, જે વાતાવરણમાં દિવ્યતા ઉમેરતું હતું.આ વિશાળ પદયાત્રામાં ચાલતા યાત્રિકોને કોઈ તકલીફ ન પડે તે માટે સેવાભાવી સંસ્થાઓએ ખૂબ જ સુંદર અને પ્રશંસનીય કામગીરી કરી હતી. રસ્તામાં ઠેર-ઠેર સેવા કેમ્પો શરૂ કરવામાં આવ્યા હતા, જ્યાં શુધ્ધ પીવાનું પાણી, ઠંડા પીણાં અને પૌષ્ટિક નાસ્તાની ઉત્તમ વ્યવસ્થા વિનામૂલ્યે પૂરી પાડવામાં આવી હતી. આ ઉમદા સેવાયજ્ઞને પ્રોત્સાહિત કરવા માટે રાજ્ય કક્ષાના ઊર્જા અને કાયદા મંત્રી કૌશિક વેકરિયા, દિલીપ સંઘાણી, અશ્વિન સાવલીયાહ સહિતનાએ ખાસ મુલાકાત લીધી હતી. તેમણે વિવિધ સ્ટોલ પર જઈને સેવા આપતા યુવાનોનો ઉત્સાહ વધાર્યો હતો.આ પદયાત્રાની સૌથી અનોખી અને ગૌરવપૂર્ણ બાબત એ હતી કે તેમાં અમરેલી જિલ્લાનું પોલીસ વહીવટી તંત્ર પણ જોડાયું હતું. અમરેલીના એસ.પી. (SP) સંજય ખરાત અને ડી.વાય.એસ.પી. (SP) ચિરાગ દેસાઈ સહિતના ઉચ્ચ અધિકારીઓ અને પોલીસ કર્મચારીઓ પોતાના પરિવાર સાથે સામાન્ય નાગરિકની જેમ પગપાળા ચાલીને દાદાના દર્શને પહોંચ્યા હતા. તેમણે કાયદો અને વ્યવસ્થાની જાળવણી સાથે પોતાની ધાર્મિક આસ્થા પણ પ્રગટ કરી હતી.મંદિરે પહોંચેલા ભક્તો માટે વ્યવસ્થાપકો દ્વારા સુંદર સાંસ્કૃતિક અને ધાર્મિક કાર્યક્રમોનું આયોજન કરવામાં આવ્યું હતું. મંદિર પરિસરમાં આખી રાત ભજન, કીર્તન અને લોક ડાયરાની રમઝટ જામી હતી. જાણીતા કલાકારોના અવાજે વાતાવરણને એકદમ ભક્તિમય બનાવી દીધું હતું. હનુમાનજીના દર્શન કરવા માટે વહેલી સવારથી જ લાંબી કતારો જોવા મળી હતી. શિસ્તબધ્ધ રીતે હજારો લોકોએ દાદાના ચરણોમાં શીશ નમાવી આશીર્વાદ મેળવ્યા હતા.
