ભારતીય ક્રિકેટ ટીમે ૮ માર્ચે ન્યૂઝીલેન્ડ સામેની ફાઇનલમાં ૯૬ રનથી વિજય સાથે ત્રીજી વખત ટી ૨૦ વર્લ્ડ કપ ૨૦૨૬ જીત્યો. જ્યારે આ મેગા ઇવેન્ટ માટે ટીમ ઇન્ડિયાની ટીમની જાહેરાત કરવામાં આવી, ત્યારે કેટલાક ખેલાડીઓ નિશ્ચિત માનવામાં આવ્યા હતા, જ્યારે અન્ય શંકાસ્પદ હતા. આવું જ એક નામ વિકેટકીપર-બેટ્સમેન જીતેશ શર્માનું હતું, જેમની ટુર્નામેન્ટ માટે પસંદગી થઈ ન હતી. જીતેશે હવે પોતાની બાદબાકી અંગે એક મહત્વપૂર્ણ નિવેદન બહાર પાડ્યું છે, જેમાં તેમણે સ્વીકાર્યું છે કે તે નિરાશ હતો, પરંતુ તે સમયે તેના પરિવારને તેની ખૂબ જરૂર હતી.
જીતેશે શર્માએ કહ્યું કે જ્યારે ટી૨૦ વર્લ્ડ કપ ૨૦૨૬ માટે ટીમ ઇન્ડિયાની જાહેરાત કરવામાં આવી અને મને મારી બાદબાકી વિશે ખબર પડી, ત્યારે હું થોડો નિરાશ થયો. હું માણસ છું, અને મને પણ ખરાબ લાગી શકે છે. જાકે, જેમ જેમ સમય પસાર થતો ગયો તેમ તેમ મારું દુઃખ ઓછું થતું ગયું. આ સમય દરમિયાન, ૧ ફેબ્રુઆરીએ, મારા પિતાનું અવસાન થયું. મેં તેમની સાથે સાત દિવસ વિતાવ્યા. તે સમયે, મને સમજાયું કે મારા પિતા અને પરિવારને વર્લ્ડ કપ કરતાં વધુ મારી જરૂર હતી. તે પછી, મને કોઈ માટે દુઃખ કે પસ્તાવો થયો નથી, કે હું કોઈ પર ગુસ્સે નથી.
પોતાના પિતાના અવસાન અંગે જીતેશ શર્માએ આગળ કહ્યું, “હું તેને ભૂલી શકતો નથી, અને હું ઈચ્છતો પણ નથી, કારણ કે તે હવે આપણી સાથે નથી. જ્યારે તમે થોડા દિવસો પછી તમારા પિતાને ગુમાવો છો, ત્યારે તમને ખ્યાલ આવે છે કે મોટા દીકરા તરીકે, પરિવારમાં નિર્ણયો લેવાની જવાબદારી હવે તમારી છે. હું એવી વ્યકિત છું જે મારી લાગણીઓ બતાવી શકતો નથી કે તેમની સામે સંવેદનશીલ બની શકતો નથી. જા મારા પિતા આજે જીવતા હોત, તો તેમણે મને કહ્યું હોત કે પ્રેક્ટીસ કરવા જા, મારી ચિંતા ના કર.”
ટીમ ઇન્ડિયાની વર્લ્ડ કપ ટીમનો ભાગ રહેલા રિંકુ સિંહને તેના પિતાના અવસાનને કારણે ટુર્નામેન્ટની વચ્ચે ઘરે પરત ફરવું પડ્યું હતું. આ અંગે જીતેશ શર્માએ કહ્યું, “મને હંમેશા યાદ છે કે જ્યારે પણ હું દુઃખી કે પીડામાં હોઉં ત્યારે તેઓ મને શું કહેતા. તે કહેતો, ‘મારી ચિંતા ના કર, રમી જા.'” મને લાગે છે કે રિંકુ સિંહને પણ એવું જ લાગ્યું. એટલા માટે તે મેદાનમાં પાછો ફરી શક્યો , અને તે એક મોટી સિદ્ધિ છે. કોઈપણ ખેલાડી માટે આ સરળ સિદ્ધિ નથી.
