દેશ હાલમાં ખૂબ જ ગંભીર કટોકટીનો સામનો કરી રહ્યો છે. દેશભરમાં એલપીજી ગેસની તીવ્ર અછત છે
આમ આદમી પાર્ટીના રાષ્ટ્રીય સંયોજક અને દિલ્હીના ભૂતપૂર્વ મુખ્યમંત્રી અરવિંદ કેજરીવાલે દેશમાં એલપીજી સિલિન્ડરોની તીવ્ર અછત અંગે કેન્દ્ર સરકાર પર નિશાન સાધ્યું છે. તેમણે ચેતવણી આપી હતી કે આ કટોકટી રેસ્ટોરાં, હોટલો અને ઉદ્યોગોને ગંભીર અસર કરી રહી છે, અને લગ્નની મોસમ દરમિયાન હજારો લગ્નો મુલતવી રાખી શકાય છે. કેજરીવાલે કહ્યું, “દેશ હાલમાં ખૂબ જ ગંભીર કટોકટીનો સામનો કરી રહ્યો છે. દેશભરમાં એલપીજી ગેસની તીવ્ર અછત છે. આપણા એલપીજી વપરાશનો ૬૦ ટકા આયાત કરવામાં આવે છે, અને તે ૬૦ ટકામાંથી ૯૦ ટકા હોર્મુઝ સ્ટ્રેટમાંથી આવે છે. હવે જ્યારે હોર્મુઝ સ્ટ્રેટ ભારત માટે બંધ થઈ ગયું છે, ત્યારે એલપીજીનો પુરવઠો લગભગ ૫૦-૫૫ ટકા ઘટી ગયો છે.”
કેજરીવાલે કહ્યું કે સરકારે રેસ્ટોરન્ટ અને હોટલોને એલપીજીનો પુરવઠો બંધ કરી દીધો છે. તેમણે કહ્યું કે સુરક્ષાના કારણોસર, આ સ્થળોએ સ્ટોક સ્ટોર કરવાની મંજૂરી નથી, તેથી પુરવઠો રોજિંદી જરૂરિયાતો પર આધારિત હતો. હવે, પુરવઠામાં અચાનક રોક લાગવાથી, તેમની પાસે એક કે બે દિવસ માટે પણ પૂરતો સ્ટોક નથી. આંકડા ટાંકીને કેજરીવાલે કહ્યું, “મુંબઈમાં ૨૦ ટકા હોટલ અને રેસ્ટોરન્ટ પહેલાથી જ બંધ થઈ ગયા છે, અને આગામી બે દિવસમાં ૫૦ ટકા બંધ થવાના છે. તમિલનાડુમાં લગભગ ૧૦,૦૦૦ હોટલ અને રેસ્ટોરન્ટ બંધ થવાની આરે છે. પંજાબ અને દિલ્હી-એનસીઆરમાં હજારો હોટલ અને રેસ્ટોરન્ટ પણ આગામી દિવસોમાં બંધ થઈ શકે છે.”
ચિંતા વ્યક્ત કરતા કેજરીવાલે કહ્યું, “જા આ પરિસ્થિતી ચાલુ રહેશે, તો ઘણા લોકોએ તેમના લગ્ન મુલતવી રાખવા પડશે.” તેમણે બેંગ્લોર, હૈદરાબાદ, પશ્ચિમ બંગાળ, છત્તીસગઢ, હરિયાણા અને બિહારથી પણ આવા જ અહેવાલો તરફ ધ્યાન દોર્યું. ટાઇલ ઉદ્યોગની રાજધાની ગણાતા ગુજરાતના મોરબીનો ઉલ્લેખ કરતા કેજરીવાલે કહ્યું, “ત્યાં ૬૦૦ થી વધુ ઉદ્યોગો, જેમાંથી ૧૭૦ બંધ થઈ ગયા છે, જેના કારણે ૧૦૦,૦૦૦ લોકો બેરોજગાર થઈ ગયા છે. આનાથી દેશભરમાં ૧૦ મિલિયનથી વધુ લોકો બેરોજગાર થવાની ધમકી છે.”
ઘરેલુ અને વાણિજયક એલપીજીના ભાવમાં તાજેતરના વધારાનો ઉલ્લેખ કરતા કેજરીવાલે કહ્યું કે બજારમાં કાળાબજાર મોટા પાયે ચાલી રહ્યું છે. તેમણે કહ્યું, “આ થઈ રહ્યું છે કારણ કે ઇઝરાયલ અને યુનાઇટેડ સ્ટેટ્સે ઇરાન પર હુમલો કર્યો છે. ઇરાન હોર્મુઝ સ્ટ્રેટ પર નિયંત્રણ રાખે છે, અને ઇરાને કહ્યું છે કે ફક્ત તેના મિત્ર દેશો, જેમ કે રશિયા અને ચીનના જહાજાને જ પસાર થવા દેવામાં આવશે.” કેજરીવાલે તાત્કાલિક કેન્દ્ર સરકારના હસ્તક્ષેપની માંગ કરી, ચેતવણી આપી કે રાષ્ટ્ર વ્યાપી આર્થિક અને સામાજિક કટોકટી વધુ ઘેરી બની શકે છે. આપ સુપ્રીમોનું આ નિવેદન એવા સમયે આવ્યું છે જ્યારે પેટ્રોલિયમ મંત્રાલયે સ્થાનિક ઉપયોગને પ્રાથમિકતા આપીને વાણિજીય્ક પુરવઠા પર નિયંત્રણ વધાર્યું છે.
