અમરેલી જિલ્લામાં અપમૃત્યુની વધુ ત્રણ ઘટના પોલીસ ચોપડે નોંધાઈ હતી. રાજુલા તાલુકાના વિસળીયા ગામે એક કરુણ ઘટના સામે આવી હતી. મોઢામાં પડેલી ચાંદી જો કેન્સરની હશે તો શું થશે? તેવી સતત ચિંતા અને ગભરાટમાં રહેતા એક મહિલાએ ઝેરી દવા પીને આપઘાત કરી લેતા ચકચાર મચી ગઈ હતી. એભલભાઇ ગોવિંદભાઇ બારૈયા (ઉ.વ.૩૦) એ જાહેર કર્યા મુજબ, મનુબેન એભલભાઇ બારૈયા (ઉ.વ.૩૦)ને છેલ્લા કેટલાક સમયથી મોઢાના ભાગે ચાંદી પડી હતી. આ સામાન્ય દેખાતી ચાંદી કેન્સરની તો નહીં હોય ને? અને જો કેન્સર થશે તો આગળ શું થશે? તેવી નકારાત્મક ચિંતામાં તેઓ સતત ડૂબેલા રહેતા હતા. બીમારીના આ ડર અને માનસિક તણાવને કારણે તેમણે આત્મઘાતી પગલું ભરવાનું નક્કી કર્યું હતું. પોતાની બીમારીના ભવિષ્યને લઈને ચિંતિત આ મહિલાએ પોતાના ઘરે કોઈ ઝેરી દવા પી લીધી હતી. ઘટનાની જાણ થતા જ પરિવારજનો દ્વારા તેમને તાત્કાલિક હોસ્પિટલ ખસેડવામાં આવ્યા હતા, પરંતુ ટૂંકી સારવાર બાદ તેમનું કરુણ મૃત્યુ નિપજ્યું હતું. આ ઘટનાને પગલે વિસળીયા ગામમાં ગમગીની છવાઈ ગઈ હતી.
