પાકિસ્તાનમાં ફરી એકવાર ભૂકંપ આવ્યો છે. પાકિસ્તાનની આર્થિક રાજધાની કહેવાતા કરાચીમાં ભૂકંપ આવ્યો છે. શનિવારે અહીં ફરી એકવાર ભૂકંપના આંચકા અનુભવાયા હતા. ભૂકંપને કારણે ઓછામાં ઓછા પાંચ વિસ્તારોમાં લોકો ગભરાટમાં પોતાના ઘરોમાંથી બહાર નીકળી આવ્યા હતા. લગભગ ૧૫ દિવસ પહેલા પણ કરાચીમાં ઘણી વખત ભૂકંપના આંચકા અનુભવાયા હતા.
કરાચી હવામાન કેન્દ્રના મુખ્ય હવામાનશાસ્ત્રી આમિર હૈદરના જણાવ્યા અનુસાર, શનિવારે આવેલા ભૂકંપની તીવ્રતા રિક્ટર સ્કેલ પર ૩.૨ માપવામાં આવી હતી. ભૂકંપનું કેન્દ્ર જમીનની અંદર ૩૮ કિલોમીટરની ઊંડાઈએ હતું. હૈદરે કહ્યું કે શહેરના ઓછામાં ઓછા પાંચ વિસ્તારોમાં આ ભૂકંપ નોંધાયા છે. તેમણે કહ્યું કે લાંધી વિસ્તારમાં ઐતિહાસિક સિસ્મિક ‘ફોલ્ટ લાઇન’માંથી ભૂકંપીય ઊર્જા છોડવાના કારણે આ ભૂકંપ અનુભવાઈ રહ્યા છે. તેમણે કહ્યું, “જો આ ઊર્જા એકસાથે છોડવામાં આવે તો મોટા ભૂકંપની શક્યતા છે, પરંતુ શનિવારે આવું કંઈ થયું નથી.”
અમીર હૈદરે કહ્યું કે ૧ જૂનથી કરાચીમાં ઓછામાં ઓછા ૨૧ ઓછી તીવ્રતાના આંચકા અનુભવાયા છે, જેની તીવ્રતા ૨.૧ થી ૩.૬ ની વચ્ચે રહી છે. તેમણે કહ્યું, “જેમ જેમ આ ફોલ્ટ લાઇન તેની ઊર્જા છોડે છે, તેમ તેમ ધ્રુજારીની તીવ્રતા પણ ઘટશે.” હૈદરે કહ્યું કે ૨૦૦૯ માં પણ આ જ ફોલ્ટ લાઇન સક્રિય થઈ ગઈ હતી, જેના કારણે શહેરમાં વારંવાર ભૂકંપ આવતા હતા, પરંતુ તે પછીથી શાંત થઈ ગયા હતા.
