મધ્ય પૂર્વમાં ચાલી રહેલા તણાવ અને તેના પરિણામે વૈશ્વક પુરવઠા શૃંખલામાં વિક્ષેપો વચ્ચે, કેન્દ્ર સરકારે એક મોટું રાહત પગલું ભર્યું છે. સરકારે અનેક આવશ્યક પેટ્રોકેમિકલ ઉત્પાદનોની આયાત પરની કસ્ટમ ડ્યુટી અસ્થાયી રૂપે હટાવી દીધી છે. આ નિર્ણય ૩૦ જૂન સુધી અમલમાં રહેશે અને તેનો સીધો ફાયદો ઉદ્યોગો અને ગ્રાહકો બંનેને થશે.
પશ્ચિમ એશિયામાં ચાલી રહેલા યુદ્ધે આંતરરાષ્ટીય પુરવઠા શૃંખલાઓને વિક્ષેપિત કરી છે. ખાસ કરીને રસાયણો, ખાતરો અને પેટ્રોલિયમ ઉત્પાદનોના પુરવઠા અંગે ચિંતા વધી છે. સરકારે દેશમાં આવશ્યક કાચા માલની ઉપલબ્ધતા સુનિશ્ચિત કરવા માટે આ પગલું ભર્યું છે.
સરકારે જે પેટ્રોકેમિકલ ઉત્પાદનો પર કસ્ટમ ડ્યુટી હટાવી છે તેમાં મિથેનોલ, નિર્જળ એમોનિયા, ટોલ્યુએન, સ્ટાયરીન, ડાયક્લોરોમેથેન, વિનાઇલ ક્લોરાઇડ મોનોમર, પોલીબ્યુટાડીન, સ્ટાયરીન બ્યુટાડીન અને અસંતૃપ્ત પોલિએસ્ટર રેઝિનનો સમાવેશ થાય છે. આ બધા ઉત્પાદનો ઘણા ઉદ્યોગો માટે મહત્વપૂર્ણ કાચા માલ છે. આ નિર્ણયથી પ્લાસ્ટિક, પેકેજિંગ, કાપડ, ફાર્માસ્યુટિકલ્સ, ઓટોમોબાઇલ્સ અને રાસાયણિક ક્ષેત્રોને સીધો ફાયદો થશે. આ ઉદ્યોગોમાં ખર્ચ ઘટશે, જેના કારણે ઉત્પાદન સસ્તું થશે અને અંતિમ ઉત્પાદનોના ભાવ પર દબાણ આવશે.
જ્યારે કંપનીઓના ખર્ચમાં ઘટાડો થશે, ત્યારે તે બજારમાં ઉપલબ્ધ ઉત્પાદનોના ભાવ પર પણ અસર કરશે. આનો અર્થ એ થયો કે પ્લાસ્ટિકની વસ્તુઓ, દવાઓ, પેકેજિંગ અને અન્ય રોજિંદા ઉત્પાદનો સસ્તા થઈ શકે છે, જેનાથી સામાન્ય લોકોને રાહત મળશે. નોંધનીય છે કે અમેરિકા અને ઇઝરાયલ દ્વારા ઇરાન પરના હુમલા પછી, વૈશ્વક સ્તરે ક્રૂડ ઓઇલના ભાવમાં લગભગ ૫૦%નો વધારો થયો છે. આનાથી ભારત જેવા આયાત-નિર્ભર દેશોની ચિંતા વધી ગઈ છે.
વધતી કિંમતોની અસરને ઘટાડવા માટે સરકારે તાજેતરમાં પેટ્રોલ અને ડીઝલ પર એક્સાઇઝ ડ્યુટીમાં ૧૦ પ્રતિ લિટરનો ઘટાડો કર્યો છે. વધુમાં, ડીઝલ અને એવિએશન ટર્બાઇન ફ્યુઅલ પર નિકાસ ડ્યુટી લાદવામાં આવી છે.