ફરી એકવાર કચ્છની દરિયાઈ સીમામાંથી માદક પદાર્થનો જથ્થો મળી આવ્યો છે. જખૌના દરિયાકિનારા પાસેથી ફરીથી ડ્રગ્સ મળવાનું શરૂ થયું છે. નલિયા મરીન કમાન્ડોની ટીમને પિંગલેશ્વર દરિયા કિનારે નિયમિત પેટ્રોલિંગ દરમિયાન ૪ શંકાસ્પદ કેફી પદાર્થ ચરસના પેકેટ બિનવારસુ મળી આવ્યા હતા. છેલ્લા ૧૦ દિવસમાં ૩૪ જેટલા ડ્રગ્સના પેકેટ ઝડપાયા છે.
કચ્છના અબડાસા નલિયા મરીન કમાન્ડોની ટીમને જખૌના પિંગલેશ્વર દરિયા કિનારે નિયમિત પેટ્રોલિંગમાં હતી. તે દરમિયાન ૪ કેફી પદાર્થ ચરસના પેકેટ બિનવારસુ મળી આવ્યા હતા. અગાઉ આ જ વિસ્તારમાંથી આવા ૭ જેટલા પેકેટ પણ મળી આવ્યા હતા. છેલ્લા ૧૦ દિવસમાં આ વિસ્તારમાંથી ૩૪ જેટલા બિનવારસુ ડ્રગ્સના પેકેટ આવ્યા છે.જખૌના પિંગલેશ્વર બીચથી રાવલપીર મંદિર વચ્ચે મરીન કમાન્ડોની ટીમના પીએસઆઇ એચ.જે. રાઠોડ સાથે અન્ય કમાન્ડો, સ્ટેટ આઇબી અને જખૌ પોલીસની સંયુક્ત ફૂટ કોસ્ટલ પેટ્રોલિંગમાં હતી. આ દરમિયાન દરિયાના પાણીમાં તણાઇ આવેલી બિનવારસુ શંકાસ્પદ ડ્રગ્સના ૪ પેકેટ મળી આવ્યા હતા. ઝડપાયેલ ચરસના ૪ પેકેટ ગુલાબી રંગના છે અને આ પેકેટમાં ગોળ રાઉન્ડમાં અંગ્રેજીમાં નં. ૧ કવોલિટી જામન ૧૨૦૦ ગ્રામ લખેલું છે.દરિયાકાંઠેથી ઝડપાયેલ ચરસના ૪ પેકેટ્સ જખૌ પોલીસે કબજે કર્યા અને વધુ સર્ચ ઓપરેશન હાથ ધરવામાં આવ્યું છે. આ ઉપરાંત જખૌ પાસેના કડુલીબારા દરિયા કિનારેથી પણ જખૌ પોલીસ, સ્ટેટ આઇબી અને એસઆરડીના જવાનોની સંયુક્ત પેટ્રોલિંગમાં આવા શંકાસ્પદ ડ્રગ્સના ૭ પેકેટ બિનવારસુ હાલતમાં મળી આવ્યા હતા.છેલ્લા ૧૦ દિવસથી જખૌના દરિયાઈ વિસ્તારમાંથી ફરી ડ્રગ્સના પેકેટ મળવાનો સિલસિલો શરૂ થયો છે.
