પોલીસે કહ્યું કે આ મામલાને ગંભીરતાથી લેવામાં આવી રહ્યો છે અને આરોપોના તમામ પાસાઓની સંપૂર્ણ તપાસ કરવામાં આવશે
બસપા પ્રમુખ માયાવતીની ભત્રીજીની ફરિયાદ પર કોર્ટના નિર્દેશ બાદ, હાપુર મ્યુનિસિપલ કાઉન્સીલના પ્રમુખ પુષ્પા દેવી અને તેમના પરિવારના છ સભ્યો વિરુદ્ધ ઘરેલુ હિંસા, દહેજ ઉત્પીડન અને જાતીય સતામણીના આરોપસર એફઆઇઆર દાખલ કરવામાં આવી છે. બસપાએ હાપુડ મ્યુનિસિપલ કાઉન્સિલના અધ્યક્ષ પુષ્પા દેવી, તેમના પતિ શ્રીપાલ સિંહ અને પુત્ર વિશાલ સિંહને પક્ષ વિરોધી પ્રવૃત્તિઓ અને અનુશાસનહીનતાના આરોપસર પાર્ટીમાંથી હાંકી કાઢ્યા છે. પાર્ટીના જિલ્લા પ્રમુખ ડા. એ.કે. કર્દમે આ માહિતી આપી.
અગાઉ, ફરિયાદીના વકીલ રાજીવ શર્માએ જણાવ્યું હતું કે મહિલાએ ૯ નવેમ્બર, ૨૦૨૩ ના રોજ હાપુડ મ્યુનિસિપલ કાઉન્સીલના પ્રમુખ પુષ્પા દેવીના પુત્ર વિશાલ સાથે લગ્ન કર્યા હતા. શર્માએ કહ્યું, “લગ્ન પછી, આરોપી પરિવારે તેમના રાજકીય પ્રભાવનો ઉપયોગ કરીને પાર્ટી ટિકિટ, ૫૦ લાખ રૂપિયા રોકડા અને ફ્લેટની માંગણી કરી હતી. ફરિયાદીએ આરોપ લગાવ્યો છે કે તેના પતિએ બોડીબિલ્ડીંગ માટે સ્ટેરોઇડ્સનો ઉપયોગ કર્યો હતો, જેના કારણે તે વૈવાહિક જીવન માટે તબીબી રીતે અયોગ્ય બન્યો હતો. ત્યારબાદ, ૧૭ ફેબ્રુઆરી, ૨૦૨૫ ના રોજ, તેના સસરા અને સાળાએ તેના પર જાતીય હુમલો કરવાનો પ્રયાસ કર્યો હતો, તેણીએ જણાવ્યું હતું. વકીલે કહ્યું કે પોલીસમાં ફરિયાદ નોંધાવવા છતાં, શરૂઆતમાં કોઈ કાર્યવાહી કરવામાં આવી ન હતી. આ પછી પીડિતાએ કોર્ટનો સંપર્ક કર્યો.
સ્ટેશન હાઉસ ઓફિસર મુનિષ પ્રતાપ સિંહે જણાવ્યું હતું કે, “મુખ્ય ન્યાયિક મેજિસ્ટ્રેટ ડા. બ્રહ્મપાલ સિંહ (૯ એપ્રિલના) ના નિર્દેશ પર, ૧૦ એપ્રિલના રોજ હાપુડ નગર કોતવાલીમાં એફઆઇઆર દાખલ કરવામાં આવી હતી. તેમણે પુષ્ટિ આપી હતી કે વધુ તપાસ ચાલી રહી છે અને યોગ્ય કાર્યવાહી કરવામાં આવશે. આરોપીઓ સામે ભારતીય દંડ સંહિતાની કલમ ૮૫ (પતિ અથવા મહિલાના પતિના સંબંધી દ્વારા ક્રૂરતાનો ભોગ બનવું), ૧૧૫ (૨) સ્વૈચ્છિક રીતે નુકસાન પહોંચાડવું), ૩૫૧ (૨) (ગુનાહિત ધાકધમકી), ૭૫ (જાતીય સતામણી), ૭૬ સ્ત્રી પર હુમલો અથવા ગુનાહિત બળજબરીથી કપડાં ઉતારવા) અને દહેજ પ્રતિબંધ કાયદાની સંબંધિત કલમો હેઠળ એફઆઇઆર નોંધવામાં આવી છે.એફઆઇઆરમાં પુષ્પા દેવી, તેના પતિ શ્રીપાલ સિંહ, પુત્ર વિશાલ અને ચાર અન્ય સંબંધીઓના નામ છે.
એફઆઈઆરમાં આરોપ મૂકવામાં આવ્યો છે કે મહિલાને તેના પતિ, સાસરિયાઓ અને પરિવારના અન્ય સભ્યો દ્વારા માનસિક અને શારીરિક ત્રાસ આપવામાં આવતો હતો, જેમણે ૫૦ લાખ રૂપિયા રોકડા અને ગાઝિયાબાદમાં એક ફ્લેટની માંગણી કરી હતી. ફરિયાદ મુજબ, જ્યારે મહિલાએ તેના સાસરિયાઓને તેના પતિની તબીબી સ્થિતિ વિશે વાત કરી, ત્યારે તેની સાસુ અને ભાભીએ કથિત રીતે તેણીને તેના સાળા ભૂપેન્દ્ર ઉર્ફે મોનુ સાથે બાળક પેદા કરવા કહ્યું.
ફરિયાદમાં આરોપ લગાવવામાં આવ્યો છે કે ૧૭ ફેબ્રુઆરીની રાત્રે, તેના સસરા અને સાળાએ તેના પર જાતીય હુમલો કરવાનો પ્રયાસ કર્યો હતો. “તેણીએ એલાર્મ વગાડ્યો હોવા છતાં, તેઓએ તેણીને પાછી અંદર ખેંચી લીધી અને જા તેમની દહેજની માંગણીઓ પૂરી નહીં થાય તો તેણી અને તેના પરિવારની પ્રતિષ્ઠા બગાડવાની ધમકી આપી,” તેણીએ આરોપ લગાવ્યો. પીડિતાએ દાવો કર્યો હતો કે શરૂઆતમાં તેના સાસરિયાઓના રાજકીય પ્રભાવને કારણે તેની ફરિયાદને અવગણવામાં આવી હતી. આ પછી, તેમણે ૨૧ માર્ચે પોલીસ અધિક્ષકને રજિસ્ટર્ડ ફરિયાદ મોકલી, પરંતુ કોઈ જવાબ ન મળ્યો, ત્યારબાદ તેમણે ૨૪ માર્ચે કોર્ટનો સંપર્ક કર્યો.
