મહારાષ્ટ્રના કલ્યાણમાં એક હૃદયદ્રાવક ઘટના પ્રકાશમાં આવી છે, જ્યાં એક ૧૩ વર્ષની સગીર છોકરીનું સૌથી પહેલા અપહરણ કરવામાં આવ્યું હતું. ત્યારબાદ તેના પર બળાત્કાર ગુજાર્યા બાદ તેની ઘાતકી હત્યા કરવામાં આવી હતી. આ ઘટનાથી સમગ્ર કલ્યાણમાં રોષ ફેલાયો છે. આજે શહેરીજનોએ મોઢા પર કાળી પટ્ટી બાંધીને રેલી કાઢી હતી અને સરકાર પાસે માંગ કરી હતી કે બદલાપુર ઘટનામાં જે રીતે આરોપી અક્ષય શિંદેનું એન્કાઉન્ટર થયું હતું તે રીતે આ આરોપીનું પણ એન્કાઉન્ટર થવુ જોઈએ. આ કેસમાં કોલસેવાડી પોલીસે આરોપી વિશાલ ગવળી અને તેની પત્નીની બુલઢાણાના શેગાંવથી ધરપકડ કરી છે.
કલ્યાણ પૂર્વના ચક્કી નાકા વિસ્તારમાં રહેતી ૧૩ વર્ષની બાળકી સોમવારે સવારે તેની માતા પાસેથી ખાવાની વસ્તુઓ ખરીદવા માટે દુકાનમાં ૨૦ રૂપિયા લઈને ગઈ હતી, પરંતુ તે ઘરે પરત ફરી ન હતી. જ્યારે છોકરી ૮-૯ કલાક સુધી ઘરે ન આવી ત્યારે પીડિતાના પરિવારે આ અંગે કલ્યાણના કોલશેવાડી પોલીસ સ્ટેશનમાં ફરિયાદ નોંધાવી. કોલશેવાડી પોલીસે અપહરણનો ગુનો નોંધી વધુ તપાસ હાથ ધરી છે. બાપગાંવમાંથી એક સગીર બાળકીનો મૃતદેહ મળી આવ્યો હતો. કોલસેવાડી પોલીસને પણ આ માહિતી મળી હતી.
કોલસેવાડી પોલીસ સ્ટેશનમાં નોંધાયેલા અપહરણના કેસની તપાસ કરી રહેલા પોલીસ અધિકારીઓ ગુમ થયેલી સગીર છોકરીના પિતા સાથે બાપગાંવ પહોંચ્યા હતા. સગીર બાળકીનો મૃતદેહ તેના પિતાને બતાવવામાં આવ્યો ત્યારે પિતાએ કહ્યું કે તે તેની પુત્રી છે. પોલીસે જણાવ્યું હતું કે બાળકીના મૃતદેહનો પોસ્ટમોર્ટમ રિપોર્ટ આવ્યા બાદ હત્યા કેવી રીતે કરવામાં આવી તે અંગેની માહિતી બહાર આવશે.
બાળકીના પિતાએ બે લોકો પર તેની પુત્રીનું અપહરણ કરવાનો, તેના પર બળાત્કાર કરવાનો અને પછી તેની હત્યા કરવાનો આરોપ લગાવ્યો છે. પોલીસે આ મામલાની ગંભીરતાથી તપાસ કરવા માટે ૫ ટીમો બનાવી હતી. વિસ્તારના સીસીટીવી ફૂટેજની તપાસ કરી અને લોકોની પૂછપરછ શરૂ કરી. થોડા મહિના પહેલા પણ આ જ યુવતીની છેડતીની ઘટના બની હતી, ત્યારે કોલસેવાડી પોલીસે આ અંગે કાર્યવાહી હાથ ધરી હતી. પરંતુ બાળકીના ત્રાસ અને હત્યાની અગાઉની ઘટના સાથે સંકળાયેલા લોકો સંડોવાયેલા છે? આ અંગે પણ પોલીસ તપાસ કરી રહી છે.
આ કેસમાં બે આરોપીઓના નામ સામે આવ્યા છે. મુખ્ય આરોપી વિશાલ ગવળી અને ગુનામાં મદદ કરનાર આરોપીની પત્નીની બુલઢાણાના શેગાંવમાંથી ધરપકડ કરવામાં આવી છે. આરોપીઓ સામે ૫ કેસ નોંધાયેલા છે. આરોપી વિશાલ ગવળીની આ ત્રીજી પત્ની છે, તેની અગાઉની બે પત્નીઓએ વિશાલને છોડી દીધો હતો.
