આઈપીએલની ઓરેન્જ કેપ ફરી બદલાઈ ગઈ છે. અત્યાર સુધી આ ખિતાબ ગુજરાત ટાઇટન્સના બેટ્સમેન સાઇ સુદર્શનના માથા પર શોભતો હતો પરંતુ હવે તે બીજા સ્થાને પહોંચી ગયો છે. આ વર્ષે અત્યાર સુધીમાં કુલ ૬ બેટ્સમેનોએ ૪૦૦ થી વધુ રન બનાવ્યા છે. આમાં, સૂર્યકુમાર યાદવ હાલમાં આગળ છે. તે ટૂંક સમયમાં ૫૦૦ રન પૂરા કરે તેવી શક્યતા છે.
સૂર્યકુમાર યાદવ હવે આ વર્ષની આઇપીએલમાં સૌથી વધુ રન બનાવનાર ખેલાડી બની ગયો છે. અત્યાર સુધીમાં તેણે ૧૧ મેચમાં ૪૭૫ રન બનાવ્યા છે. હવે ટૂંક સમયમાં તે ૫૦૦ રન બનાવનાર બેટ્સમેન પણ બનશે. અત્યાર સુધીમાં, તેણે ૬૭.૮૫ ની સરેરાશ અને ૧૭૨.૭૨ ના સ્ટ્રાઇક રેટથી રન બનાવ્યા છે. આ સમયગાળા દરમિયાન તેણે ત્રણ અડધી સદીની ઇનિંગ્સ રમી છે.
સાઈ સુદર્શન, જે અત્યાર સુધી પહેલા સ્થાને હતા, હવે બીજા સ્થાને પહોંચી ગયા છે. તેણે અત્યાર સુધી માત્ર ૯ મેચમાં ૪૫૬ રન બનાવ્યા છે. તેની સરેરાશ ૫૦ છે અને તે ૧૫૦ ના સ્ટ્રાઇક રેટથી સ્કોર કરી રહ્યો છે. તેણે અત્યાર સુધીમાં ૫ અડધી સદી ફટકારી છે. વિરાટ કોહલી હાલમાં આ મામલે ત્રીજા નંબરે છે. તેણે ૧૦ મેચમાં ૪૪૩ રન બનાવ્યા છે. યશસ્વી જયસ્વાલની વાત કરીએ તો, તેણે ૧૧ મેચમાં ૪૩૯ રન બનાવ્યા છે. તેણે પોતાની ટીમ માટે પાંચ અડધી સદી ફટકારી છે. એટલે કે ટોચના ૪ બેટ્સમેનોમાં ફક્ત ભારતીય બેટ્સમેનોનો જ કબજા છે.
દરમિયાન, જો આપણે ભારતીય બેટ્સમેન પછી વિદેશી ખેલાડીઓની વાત કરીએ, તો જાસ બટલર સૌથી વધુ રન બનાવનાર વિદેશી બેટ્સમેન છે. અત્યાર સુધીમાં તે ૯ મેચમાં ૪૦૬ રન બનાવી શક્યો છે. તે ૮૧.૨૦ ની સરેરાશ અને ૧૬૮.૪૬ ના સ્ટ્રાઇક રેટથી રન બનાવી રહ્યો છે. તેના નામે ચાર અડધી સદી પણ છે. નિકોલસ પૂરને ૧૦ મેચમાં ૪૦૪ રન બનાવ્યા છે. આ છ બેટ્સમેનોએ આ વર્ષની આઇપીએલમાં અત્યાર સુધીમાં ૪૦૦ થી વધુ રન બનાવ્યા છે. હવે જાવાનું એ છે કે અંતે કોણ જીતે છે. એક મોટી ઇનિંગ કોઈપણ બેટ્સમેનને ટોચ પર લઈ જઈ શકે છે. એનો અર્થ એ થયો કે આ ક્ષણે ઓરેન્જ કેપ માટે ભીષણ યુદ્ધ ચાલી રહ્યું છે, જે ભવિષ્યમાં વધુ રસપ્રદ બનશે.
