સાઉદી અરેબિયામાં એક દુઃખદ માર્ગ અકસ્માત થયો છે. અકસ્માતમાં ૪૨ ભારતીય મુસાફરોના મોત થયા છે. મોટાભાગના મૃતકો હૈદરાબાદના હતા. આ અકસ્માત ત્યારે થયો જ્યારે મક્કાથી મદીના જતી એક પેસેન્જર બસ ડીઝલ ટેન્કર સાથે અથડાઈ. આ અકસ્માત મુફરરીહાટ વિસ્તારમાં થયો હોવાનું કહેવાય છે. અકસ્માત બાદ ઇમરજન્સી ટીમો બચાવ અને રાહત કામગીરીમાં રોકાયેલી છે.મુખ્યમંત્રી રેવંત રેડ્ડીએ સાઉદી અરેબિયામાં થયેલા દુઃખદ અકસ્માત પર ઊંડો શોક વ્યક્ત કર્યો. મક્કાથી મદીના જતી વખતે આ અકસ્માત થયો અને હૈદરાબાદના રહેવાસીઓ પણ તેમાં સામેલ હતા તેવા પ્રારંભિક અહેવાલો પર તાત્કાલિક પ્રતિક્રિયા આપતા મુખ્યમંત્રીએ મુખ્ય સચિવ અને પોલીસ મહાનિર્દેશકને સંપૂર્ણ માહિતી મેળવવાનો નિર્દેશ આપ્યો.વિદેશ મંત્રી એસ. જયશંકરે સાઉદી અરેબિયામાં થયેલા અકસ્માત પર દુઃખ વ્યક્ત કર્યું અને જણાવ્યું કે રિયાધમાં દૂતાવાસ અને જેદ્દાહમાં કોન્સ્યુલેટ જનરલ અકસ્માતથી પ્રભાવિત ભારતીય નાગરિકો અને તેમના પરિવારોને શક્્ય તેટલી બધી સહાય પૂરી પાડી રહ્યા છે. તેમણે કહ્યું, “સાઉદી અરેબિયાના મદીનામાં ભારતીય નાગરિકો સાથે થયેલા અકસ્માતથી અમને ખૂબ જ દુઃખ થયું છે. રિયાધમાં અમારું દૂતાવાસ અને જેદ્દાહમાં કોન્સ્યુલેટ જનરલ આ અકસ્માતથી પ્રભાવિત ભારતીય નાગરિકો અને તેમના પરિવારોને શક્ય તેટલી બધી સહાય પૂરી પાડી રહ્યા છે. અમે શોકગ્રસ્ત પરિવારો પ્રત્યે ઊંડી સંવેદના વ્યક્ત કરીએ છીએ. ઘાયલોના ઝડપી સ્વસ્થ થવાની પ્રાર્થના કરીએ છીએ.”બસમાં સવાર તમામ ભારતીય મુસાફરો ઉમરાહ યાત્રા પૂર્ણ કરીને મદીના પરત ફરી રહ્યા હતા. બાજુમાંથી આવતા ડીઝલ ટેન્કરે બસને ટક્કર મારી ત્યારે મોટાભાગના લોકો ઊંઘમાં હતા. ટક્કર એટલી ગંભીર હતી કે બસને ભારે નુકસાન થયું અને તેમાં આગ લાગી ગઈ. સાઉદી બચાવ ટીમો તાત્કાલિક ઘટનાસ્થળે પહોંચી ગઈ અને બચાવ કામગીરી શરૂ કરી. ઘણા મુસાફરો ગંભીર રીતે ઘાયલ થયા હોવાના અહેવાલ છે.સાઉદી અરેબિયાના મદીના નજીક ભારતીય ઉમરાહ યાત્રાળુઓ સાથે થયેલા દુઃખદ બસ અકસ્માતને પગલે, જેદ્દાહમાં ભારતીય કોન્સ્યુલેટ જનરલે હેલ્પલાઇન નંબર જાહેર કર્યો છે. મક્કા-મદીના હાઇવે ઉમરાહ અને હજ યાત્રાળુઓ માટે સૌથી વ્યસ્ત માર્ગ છે. દર વર્ષે હજારો ભારતીયો આ માર્ગ પર મુસાફરી કરે છે.નોંધનીય છે કે સાઉદી અરેબિયામાં પહેલા પણ આવા જ અકસ્માતો થયા છે. ૨૦૨૩ માં, સમાન અકસ્માતમાં ૨૦ લોકો માર્યા ગયા હતા. મક્કા-મદીના હાઇવે પર ટ્રાફિકનું પ્રમાણ વધુ છે, જે ઘણીવાર અકસ્માતોનું કારણ બને છે.
