દિલ્હી-એનસીઆરમાં વધતા વાયુ પ્રદૂષણ અંગે આજે સુપ્રીમ કોર્ટમાં સુનાવણી યોજાઈ હતી. વધતા વાયુ પ્રદૂષણ વચ્ચે, સુપ્રીમ કોર્ટે દિલ્હીમાં તમામ બાંધકામ કાર્ય બંધ કરવાના સૂચનને ફગાવી દીધું છે. સુપ્રીમ કોર્ટે કહ્યું, “આનાથી મોટી સંખ્યામાં લોકો પ્રભાવિત થશે. આવા પગલાં લેવાને બદલે, આપણે લાંબા ગાળાના ઉકેલો પર વિચાર કરવો જાઈએ.સીએકયુએમ પ્રદૂષણની સ્થિતિના આધારે યોગ્ય પગલાં લે છે.”કોર્ટે કેન્દ્ર સરકારને પંજાબ, હરિયાણા, ઉત્તર પ્રદેશ અને રાજસ્થાનની સરકારો સાથે મુલાકાત કરીને લાંબા ગાળાના ઉકેલો પર સૂચનો આપવાનો નિર્દેશ આપ્યો છે. તેણે આ માટે એક દિવસનો સમય આપ્યો છે. આ મામલાની સુનાવણી હવે બુધવાર, ૧૯ નવેમ્બરના રોજ થશે.કોર્ટે દિલ્હીમાં પ્રદૂષણનું નિરીક્ષણ કરવા માટે ઉપયોગમાં લેવાતા ઉપકરણો આમ કરવા સક્ષમ છે કે કેમ તે અંગે સોગંદનામું પણ માંગ્યું. દરમિયાન, વધતા પ્રદૂષણને કારણે દિલ્હીના લોકો નોંધપાત્ર મુશ્કેલીઓનો સામનો કરી રહ્યા છે.રાષ્ટ્રીય રાજધાની દિલ્હી અને તેની આસપાસના વિસ્તારોમાં વાયુ પ્રદૂષણ સતત તબાહી મચાવી રહ્યું છે. સોમવારે સવારે ૫ વાગ્યા સુધીના ડેટા અનુસાર, શહેરનો સરેરાશ હવા ગુણવત્તા સૂચકાંક ૩૫૯ નોંધાયો હતો, જે “ખૂબ જ ખરાબ” શ્રેણીમાં આવે છે.કેન્દ્રીય પ્રદૂષણ નિયંત્રણ બોર્ડના ડેટા અનુસાર, બવાના જેવા ઘણા વિસ્તારોમાં એકયુઆઇ ૪૨૭ પર પહોંચ્યો, જે “ગંભીર” શ્રેણીમાં આવે છે. બપોર સુધીમાં, કેટલાક વિસ્તારોમાં હવાની ગુણવત્તામાં થોડો સુધારો થયો હતો, પરંતુ એકંદર પરિસ્થિતિ ચિંતાજનક રહી હતી.
