સાવરકુંડલા તાલુકાના લુવારા ગામે દાનેવ યુવા ગ્રુપના યુવાનો દ્વારા છેલ્લા પંદર દિવસથી ધોમધખતા તાપમાં બાપા સીતારામ મઢુલી ખાતે ઠંડા શરબતનું નિઃસ્વાર્થ સેવા કાર્ય કરવામાં આવી રહ્યું છે. શરૂઆતમાં માત્ર બે દિવસ માટે આયોજન કરવામાં આવ્યું હતું, પરંતુ કાળઝાળ ગરમીને જોતા યુવાનોએ આ સેવા કાર્યને લંબાવવાનો નિર્ણય લીધો. આ સેવા કાર્યને સફળ બનાવવા માટે સમગ્ર યુવા ગ્રુપે ભારે જહેમત ઉઠાવી છે. નોંધનીય બાબત એ છે કે આ સેવા કાર્ય ફક્ત ગ્રામજનોના સહયોગથી ચાલી રહ્યું છે અને બહારથી કોઈ પણ પ્રકારનું દાન સ્વીકારવામાં આવતું નથી. ‘‘ગરમીમેં ઠંડક’’ આપતા આ માનવસેવા અભિયાનની સમગ્ર પંથકમાં ભારે પ્રશંસા થઈ રહી છે.
