રશિયા અને યુક્રેન વચ્ચે યુદ્ધ ચાલુ છે. ચાલી રહેલા સંઘર્ષ વચ્ચે, રશિયાએ શુક્રવારે યુક્રેનની રાજધાની કિવ નજીક મોટા પાયે મિસાઇલ અને ડ્રોન હુમલા કર્યા. હુમલામાં ઓછામાં ઓછા ૮ લોકો માર્યા ગયા છે. રશિયા દ્વારા આ હુમલો એવા સમયે કરવામાં આવ્યો છે જ્યારે યુક્રેનના રાષ્ટ્રપતિ વોલોડીમીર ઝેલેન્સકીએ ઇસ્ટર માટે યુદ્ધવિરામનો સંકેત આપ્યો હતો, જે ૧૨ એપ્રિલે યુક્રેન અને રશિયા બંનેમાં ઉજવવામાં આવે છે.
અધિકારીઓએ અહેવાલ આપ્યો છે કે રશિયન હુમલામાં ઘણા લોકો ઘાયલ પણ થયા છે. અધિકારીઓના જણાવ્યા અનુસાર, શુક્રવારે રશિયાએ ઉત્તરી યુક્રેનના કિવ પ્રદેશમાં એક એપાર્ટમેન્ટ બ્લોક પર બોમ્બમારો કર્યો હતો. કિવ પ્રાદેશિક લશ્કરી વહીવટીતંત્રના વડા માયકોલા કલાશ્નિકે શુક્રવારે સવારે ટેલિગ્રામ પર વાત કરતા કહ્યું કે કિવ પ્રદેશ ફરી એકવાર રશિયન મિસાઇલ અને ડ્રોન હુમલાનો ભોગ બન્યો છે. તેમણે કહ્યું કે બુચા, ફાસ્ટિવ અને ઓબુખિવ શહેરો પર થયેલા હુમલાઓમાં ભારે નુકસાન થયું છે. કલાશ્નિકે એ પણ અહેવાલ આપ્યો છે કે હુમલામાં એક પશુચિકિત્સા ક્લિનિકને નુકસાન થયું છે, જેમાં આશરે ૨૦ પ્રાણીઓ માર્યા ગયા છે.
યુક્રેનના વિદેશ પ્રધાન એન્ડ્રી ત્સીબિહાએ સોશિયલ મીડિયા પ્લેટફોર્મ ઠ પર એક પોસ્ટમાં કહ્યું હતું કે આશરે ૫૦૦ ડ્રોન અને ક્રુઝ મિસાઇલોએ યુક્રેન પર હુમલો કર્યો હતો. ત્સીબિહાએ કહ્યું, “યુક્રેનના ઇસ્ટર યુદ્ધવિરામ પ્રસ્તાવોનો મોસ્કો આ રીતે જવાબ આપે છે – ક્રૂર હુમલાઓ સાથે.” યુક્રેન અને રશિયામાં ઓર્થોડોક્સ ચર્ચો દ્વારા અનુસરવામાં આવતા જુલિયન કેલેન્ડર અનુસાર, ઇસ્ટર આવતા અઠવાડિયે આવે છે.
રાષ્ટÙપતિ વ્લાદિમીર પુતિને ગયા વર્ષે ઇસ્ટર માટે એકપક્ષીય રીતે ૩૦ કલાકના યુદ્ધવિરામની જાહેરાત કરી હતી, પરંતુ બંને પક્ષોએ એકબીજા પર યુદ્ધવિરામનું ઉલ્લંઘન કરવાનો આરોપ લગાવ્યો હતો. રશિયન સંરક્ષણ મંત્રાલયે સવારે અહેવાલ આપ્યો હતો કે રશિયા અને કબજા હેઠળના ક્રિમીઆ પર રાતોરાત ૧૯૨ યુક્રેનિયન ડ્રોનને તોડી પાડવામાં આવ્યા હતા.
