ઇંગ્લેન્ડ અને ભારત વચ્ચે પાંચ મેચની ટેસ્ટ શ્રેણીની બીજી મેચ એજબેસ્ટન મેદાન પર રમાશે. આ મેચમાં, ટીમ ઇન્ડીયાના ઓપનિંગ બેટ્સમેન યશસ્વી જયસ્વાલ પાસે ઇતિહાસ રચવાની તક હશે. આ મેચમાં, તે ભારત માટે ટેસ્ટ ક્રિકેટમાં સૌથી ઝડપી ૨૦૦૦ રન બનાવનાર બેટ્સમેન બની શકે છે. મેચની દ્રષ્ટિએ ટેસ્ટ ક્રિકેટમાં સૌથી ઝડપી ૨૦૦૦ રન બનાવવાનો રેકોર્ડ સુનિલ ગાવસ્કરના નામે છે. તે જ સમયે, ઇનિંગ્સના આધારે સૌથી ઝડપી ૨૦૦૦ ટેસ્ટ રન બનાવવાનો રેકોર્ડ રાહુલ દ્રવિડ અને વીરેન્દ્ર સેહવાગના નામે છે.
યશસ્વી જયસ્વાલે અત્યાર સુધી ટેસ્ટ ક્રિકેટમાં ૨૦ મેચોમાં ૫૨.૮૬ ની સરેરાશ સાથે ૧૯૦૩ રન બનાવ્યા છે. તે ટેસ્ટ ક્રિકેટમાં ૨૦૦૦ રનના આંકડાને સ્પર્શવાથી માત્ર ૯૭ રન દૂર છે. જો તે એજબેસ્ટન ખાતે રમાનારી બીજી ટેસ્ટમાં ૯૭ રન બનાવવામાં સફળ થાય છે, તો તે સૌથી ઓછી મેચોમાં ૨૦૦૦ ટેસ્ટ રન બનાવનાર ભારતીય બની જશે. હાલમાં આ રેકોર્ડ લિટલ માસ્ટર સુનિલ ગાવસ્કરના નામે છે. ગાવસ્કરે ૨૩ ટેસ્ટ મેચોમાં ૨૦૦૦ રનનો આંકડો પાર કર્યો હતો. જયસ્વાલ પાસે ગાવસ્કરના આ રેકોર્ડને તોડવા માટે બે મેચ હશે.
જો આપણે ટેસ્ટ ક્રિકેટમાં સૌથી ઝડપી ૨૦૦૦ રન બનાવનારા અન્ય ભારતીય બેટ્સમેનોની વાત કરીએ, તો સુનીલ ગાવસ્કર પછી રાહુલ દ્રવિડ અને વીરેન્દ્ર સેહવાગ જેવા દિગ્ગજ છે. આ બંને ભૂતપૂર્વ ખેલાડીઓએ ૨૫ મેચમાં આ આંકડો હાંસલ કર્યો હતો. બીજી બાજુ, જા આપણે ઇનિંગ્સની દ્રષ્ટિએ સૌથી ઝડપી ૨૦૦૦ ટેસ્ટ રન બનાવવાના રેકોર્ડની વાત કરીએ, તો રાહુલ દ્રવિડ અને વીરેન્દ્ર સેહવાગનું નામ ટોચ પર છે. બંનેએ ૪૦-૪૦ ઇનિંગ્સમાં આ રેકોર્ડ બનાવ્યો હતો, જ્યારે ગાવસ્કરે ૪૪ ઇનિંગ્સમાં ૨૦૦૦ ટેસ્ટ રન પૂરા કર્યા હતા. યશસ્વી જયસ્વાલ પાસે અત્યાર સુધી ટેસ્ટ ક્રિકેટમાં ૩૮ ઇનિંગ્સ રમી છે, જો તે બીજી ટેસ્ટની પ્રથમ ઇનિંગ્સમાં ૯૭ રન બનાવે છે, તો તે સૌથી ઓછી ઇનિંગ્સમાં ૨૦૦૦ ટેસ્ટ રન બનાવનાર ભારતીય બેટ્સમેન બનશે.
યશસ્વી જયસ્વાલે ઇંગ્લેન્ડ સામે લીડ્સ ટેસ્ટ મેચમાં પ્રથમ ઇનિંગમાં સદી ફટકારી હતી, પરંતુ આ મેચમાં તેની ફિલ્ડિગ ખૂબ જ નબળી રહી હતી. જેના કારણે તેને ખૂબ ટ્રોલ કરવામાં આવ્યો હતો. તેણે બંને ઇનિંગમાં ઓછામાં ઓછા પાંચ કેચ છોડ્યા હતા. તે જ સમયે, બીજી ઇનિંગમાં, તે બેટથી ફ્લોપ ગયો અને માત્ર ૪ રન બનાવીને આઉટ થયો. હવે જાવાનું એ છે કે તે બીજી ટેસ્ટ મેચમાં કેવું પ્રદર્શન કરે છે.
