પશ્ચિમ બંગાળ ભાજપના ભૂતપૂર્વ પ્રમુખ દિલીપ ઘોષના પત્ની રિંકુ ઘોષના પુત્રનું અકુદરતી મૃત્યુ થયું છે. ૨૭ વર્ષીય શ્રીંજય દાસગુપ્તાનો મૃતદેહ ન્યુ ટાઉનના એક ફ્લેટમાંથી મળી આવ્યો હતો. વ્યવસાયે આઇટી કાર્યકર શ્રીંજયને પહેલા ન્યુ ટાઉનની એક ખાનગી હોસ્પિટલમાં લઈ જવામાં આવ્યો. બાદમાં તેમને બિધાનનગર હોસ્પિટલમાં લઈ જવામાં આવ્યા હતા પરંતુ ડોક્ટરોએ તેમને મૃત જાહેર કર્યા હતા.તપાસકર્તાઓ શબપરીક્ષણ પહેલાં મૃત્યુના કારણ અંગે કોઈ ટિપ્પણી કરવા માંગતા ન હતા. શ્રીંજયના શરીરનું પોસ્ટમોર્ટમ મંગળવારે થવાની શક્યતા છે. એવું કહેવામાં આવી રહ્યું છે કે મૃતદેહનું પોસ્ટમોર્ટમ આર જી કાર મેડિકલ કોલેજ હોસ્પિટલમાં કરવામાં આવશે.
દિલીપ ઘોષે તાજેતરમાં જ ભાજપ નેતા રિંકુ મજુમદાર સાથે લગ્ન કર્યા. મળતી માહિતી મુજબ, ઘોષની માતા ઇચ્છતી હતી કે તેના દીકરાના લગ્ન થાય જેથી તે તેની પુત્રવધૂ સાથે થોડો સમય વિતાવી શકે. રિંકુ ઘોષ છૂટાછેડા લીધેલી હતી અને તેને પહેલા લગ્નથી એક પુત્ર, શ્રીંજય દાસગુપ્તા હતો. પરંતુ તેની માતાના લગ્નના ૨૫ દિવસની અંદર જ શ્રીંજયનું અવસાન થયું. શ્રીંજયના અકુદરતી મૃત્યુ પર ઘણા પ્રશ્નો ઉભા થઈ રહ્યા છે.
દિલીપ ઘોષનો જન્મ ૧ ઓગસ્ટ ૧૯૬૪ના રોજ પશ્ચિમ બંગાળના મેદિનીપુરમાં થયો હતો. એક ભારતીય રાજકારણી છે. તેઓ પશ્ચિમ બંગાળ ભાજપના ૯મા પ્રમુખ રહ્યા છે. દિલીપ ઘોષે ૧૯૮૪માં આરએસએસ પ્રચારક તરીકે પોતાની રાજકીય સફર શરૂ કરી હતી. તેઓ ૨૦૧૪ માં ભાજપમાં જોડાયા અને ૨૦૧૫ માં પશ્ચિમ બંગાળ ભાજપના પ્રમુખ બન્યા. તેમણે ૨૦૧૬ ની વિધાનસભા ચૂંટણી ખડગપુર સદર બેઠક પરથી જીતી હતી. આ પછી, તેમણે વર્ષ ૨૦૧૯ માં મેદનીપુર લોકસભા બેઠક પરથી પણ ચૂંટણી જીતી હતી.
