કર્ણાટકના બેલ્લારીમાં ગુરુવારે મોડી રાત્રે કોંગ્રેસ અને ભાજપ સમર્થકો વચ્ચે હિંસક અથડામણ થઈ. અથડામણ દરમિયાન થયેલા ગોળીબારમાં એક કોંગ્રેસ કાર્યકર રાજશેખરનું પણ મોત થયું. હવે, કોંગ્રેસ કાર્યકર રાજશેખરના મૃત્યુ અંગે એક મોટો ખુલાસો થયો છે. પોલીસ સૂત્રોના જણાવ્યા અનુસાર, પોસ્ટમોર્ટમ અને ફોરેન્સિક તપાસમાં જાણવા મળ્યું છે કે રાજશેખરને વાગેલી ગોળી કથિત રીતે કોંગ્રેસના ધારાસભ્ય નારા ભરત રેડ્ડીના અંગત અંગરક્ષકની બંદૂકમાંથી ચલાવવામાં આવી હતી.
રાજશેખરનું પોસ્ટમોર્ટમ બેલ્લારી મેડિકલ કોલેજ અને રિસર્ચ સેન્ટરમાં કરવામાં આવ્યું હોવાનું જણાવાયું છે. ફોરેન્સિક ટીમે તેમના શરીરમાંથી ૧૨ મીમી સિંગલ-બોર ગોળીનો ટુકડો મેળવ્યો. તપાસમાં જાણવા મળ્યું કે આ ટુકડો કોંગ્રેસના ધારાસભ્ય નારા ભરત રેડ્ડી અને તેમના નજીકના સહયોગીઓના અંગરક્ષક અને સરકારી અંગરક્ષકો પાસેથી જપ્ત કરાયેલી બંદૂકોમાં વપરાયેલા કારતૂસ સાથે મેળ ખાય છે.
ઘર્ષ બાદ, પોલીસે ભરત રેડ્ડી અને તેમના સહયોગીઓના અંગરક્ષક અને સરકારી બંદૂકધારીઓની કુલ પાંચ બંદૂકો જપ્ત કરી અને તેમને બ્રુસપેટ પોલીસ સ્ટેશનમાં રાખી. ફોરેન્સિક નિષ્ણાતોએ ઘટનાસ્થળેથી મળેલી સામગ્રી અને પોસ્ટમોર્ટમ દરમિયાન મળેલા ગોળીના ટુકડાઓની તુલના આ શસ્ત્રો સાથે કરી. વરિષ્ઠ અધિકારીઓના જણાવ્યા અનુસાર, વૈજ્ઞાનિક પુરાવા દર્શાવે છે કે આ ગોળી આ અંગરક્ષકોની બંદૂકમાંથી એકમાંથી ચલાવવામાં આવી હતી.
ભાજપની ફરિયાદ બાદ, કોંગ્રેસના ધારાસભ્ય નારા ભરત રેડ્ડી અને તેમના સમર્થકો સામે પણ એફઆઇઆર દાખલ કરવામાં આવી છે. શહેરમાં થયેલી અથડામણના સંદર્ભમાં ધારાસભ્ય નારા ભરત રેડ્ડી અને તેમના સમર્થકો વિરુદ્ધ બે અલગ અલગ એફઆરઆઈ દાખલ કરવામાં આવી છે. બંને એફઆરઆઈ બ્રુસપેટ પોલીસ સ્ટેશનના અધિકારક્ષેત્ર હેઠળ દાખલ કરવામાં આવી છે.
ભાજપની ફરિયાદના આધારે, ધારાસભ્ય જનાર્દન રેડ્ડીના ઘરમાં ઘૂસણખોરી, જાતિવાદી ટિપ્પણી અને હુમલો કરવાનો પ્રયાસ કરવાના આરોપો મૂકવામાં આવ્યા છે. આ આરોપોમાં ધારાસભ્ય ભરત રેડ્ડી, તેમના પિતા સૂર્યનારાયણ રેડ્ડી, તેમના કાકા પ્રતાપ રેડ્ડી અને નજીકના સહયોગીઓ સતીશ રેડ્ડી, ચૈનલ શેખર, લોકેશ અવ્વાબાવી અને ગંગાધર સહિત અન્ય લોકોનો સમાવેશ થાય છે. એક કેસમાં ૪૧ અને બીજા કેસમાં ૨૩ લોકો સામે એફઆઇઆર દાખલ કરવામાં આવી છે. બંને ફરિયાદો બ્રુસપેટ પોલીસ સ્ટેશનમાં નોંધાઈ હતી.
