પાકિસ્તાન આર્મી ચીફ અસીમ મુનીર યુએસ મુલાકાતઃ એક તરફ, યુએસ રાષ્ટ્રપતિ ડોનાલ્ડ ટ્રમ્પે વિશ્વ સામે ટેરિફ યુદ્ધ છેડ્યું છે, તો બીજી તરફ, પાકિસ્તાન પ્રત્યેનો તેમનો પ્રેમ વધી રહ્યો હોય તેવું લાગે છે. પાકિસ્તાન આર્મી ચીફ અસીમ મુનીર બે મહિનામાં બીજી વખત અમેરિકા જવાના છે. અગાઉ, મુનીરે જૂનમાં અમેરિકાની મુલાકાત લીધી હતી. અસીમ મુનીર પછી, પાકિસ્તાન વાયુસેનાના વડા ઝહીર અહેમદ બાબર સિદ્ધુ પણ અમેરિકાની મુલાકાતે ગયા હતા.
જનરલ અસીમ મુનીર યુએસ સેન્ટ્રલ કમાન્ડ (સેન્ટકોમ) કમાન્ડર જનરલ માઈકલ ઈ કુરિલાના વિદાય સમારંભમાં હાજરી આપવા માટે અમેરિકાની મુલાકાતે જવાના છે. એવું માનવામાં આવે છે કે કુરિલાનો વિદાય સમારંભ ફ્લોરિડાના ટામ્પા સ્થિત સેન્ટકોમ મુખ્યાલયમાં યોજાશે. સેન્ટકોમ કમાન્ડર જનરલ માઈકલ ઈ કુરિલાએ જુલાઈના અંતમાં પાકિસ્તાનની મુલાકાત લીધી હતી.
યુએસ સેન્ટકોમ કમાન્ડર જનરલ કુરિલાને પાકિસ્તાન પ્રત્યે ઊંડો પ્રેમ રહ્યો છે અને તેઓ આતંકવાદ, ખાસ કરીને ઈસ્લામિક સ્ટેટ – ખોરાસન સામેની લડાઈમાં ઈસ્લામાબાદની ભૂમિકાની ઘણી વાર પ્રશંસા કરી ચૂક્્યા છે. જાકે, કુરિલાએ દલીલ કરી છે કે અમેરિકાને ભારત અને પાકિસ્તાન બંને સાથે સારા સંબંધો રાખવાની જરૂર છે.
આ વર્ષે જૂનમાં અસિમ મુનીરે અમેરિકાની મુલાકાત લીધી હતી. આ સમય દરમિયાન, તેમણે યુએસ પ્રમુખ ડોનાલ્ડ ટ્રમ્પ સાથે લંચ પણ કર્યું હતું. આ મુલાકાત લગભગ બે કલાક ચાલી હતી. વ્હાઇટ હાઉસના પ્રવક્તા અન્ના કેલીએ કહ્યું હતું કે રાષ્ટ્રપતિ ટ્રમ્પે જનરલ મુનીરને મળવા માટે બોલાવ્યા હતા કારણ કે મુનીરે ટ્રમ્પને ભારત અને પાકિસ્તાન વચ્ચે સંભવિત પરમાણુ યુદ્ધ અટકાવવા માટે તેમને નોબેલ શાંતિ પુરસ્કાર આપવાની ભલામણ કરી હતી.
આ દરમિયાન, અમે તમને અહીં એ પણ જણાવી દઈએ કે અમેરિકા પાકિસ્તાન પ્રત્યે દયાળુ લાગે છે. પાકિસ્તાન પર લાદવામાં આવેલા ટેરિફ આનો સંકેત છે. તાજેતરમાં અમેરિકા દ્વારા લાદવામાં આવેલા ટેરિફમાં પાકિસ્તાનને મોટી છૂટ આપવામાં આવી છે. ટ્રમ્પ વહીવટીતંત્રે પાકિસ્તાન પરના ટેરિફ ૨૯ ટકાથી ઘટાડીને ૧૯ ટકા કર્યા છે. અમેરિકાએ તાજેતરમાં પાકિસ્તાન સાથે તેલ કરાર પણ કર્યો છે. એટલું જ નહીં, આંતરરાષ્ટ્રિય નાણાકીય ભંડોળ તરફથી પાકિસ્તાનને મળેલી મદદમાં પણ અમેરિકાએ મોટી ભૂમિકા ભજવી છે.
